Atsolorra prestatzeko lehenengo bilera egingo dute
Ostegunean izango da lehenengo bilera. 2022an jaiotako 62 oiartzuarrei ongietorria emateko ekitaldia maiatzean izango da.
Iaz egindako atsolorra, 2021n jaiotako haurrei eskainitakoa.
Erabat errotuta dagoen ohitura da atsolorra, eta aurten bide horretan jarraituko dute. 2022an jaiotako 62 oiartzuarrei ongietorria egiteko ekitaldia antolatuko dute.
Maiatzean izango da atsolorra, baina prestaketa lanak lehenago hasiko dira. Datorren ostegunean —hilak 9— izango da estreinako saioa.
Iaz guraso izan ziren oiartzuarrak gonbidatu ditu udalak, etzi arratsaldean udaletxeko pleno aretoan ager daitezen. Hitzordua 17:00etan jarri dute.
Atsolorra herriko jaioberriei harrera egiteko ekitaldia da. Komunitateak ongietorria egiten die oiartzuar berriei, eta euskal kulturan hezteko konpromisoa hartzen dute.
2014an hasi ziren ekitaldi hori modu ofizialean egiten, udala eta hainbat herritar elkarlanean. Ordutik, urtero errepikatu den ekitaldia izan da atsolorra.
