Jesus Mari Corman antxotarrak bi poesia liburu aurkeztuko ditu
Ostiral honetan izango da bi lanen aurkezpena, Donostian. 'Laster berandu izango da' eta 'Iraganeko planak' dute izena bildumek.
Jesus Mari Corman artista antxotarra. 
Laster berandu izango da eta Iraganeko planak (Bermingham Editoriala) izeneko gaztelerazko bi poesia liburu argitaratu ditu Jesus Mari Corman idazle eta margolari antxotarrak, eta horien aurkezpena datorren ostiralean egingo du, Donostiako Udal Liburutegi Nagusian.
19:30ean hasiko da ostiraleko ekitaldia, eta Cormanekin batera izango dira Aroa Moreno Duran nobelista (Antxo oinarri, La Bajamar eleberria argitaratu zuen iaz), Igor Goienetxea idazlea, eta Felix Maraña idazle eta editorea.
Antxotarrak urteak daramatza hark sorturiko arte erakusketa eta liburuak aurkezten, baina azken biak bereziak direla aitortu du, iaz zendutako gurasoei zuzendutakoak baitira. “Aurkezpen hau berezia da niretzat”, mintzatu da. Aita eta ama joan den udaran galdu zituen, bi hilabeteko aldearekin bataren eta bestearen heriotzaren artean. “Euren oroitzapenari eta gure harremanari egindako omenaldi poetikoa dira liburu hauek”.
