[Galeria eta bideoa] Luze jo du esperoak, baina merezi izan du
Hiru urteren ondoren, intxixu, basandere eta sorginak plazara iritsi dira, eta udaletxea hartu dute. Murrizketarik gabeko festak izango dira.
“Heldu dila, heldu dila!” izan da arratsaldean zehar plazan gehien entzun den esaldia. Orain dela hiru urte egin ziren, azkeneko aldiz, ihoteak normaltasunean, zer zetorren arrastorik izan gabe.
Iaz kuestazioak bakarrik egin ziren, osasun neurriak indarrean zeudelako. Gaur, ez. Gaur jendetza bildu da asteburu honetan festaren epizentroa izango den plazan.
17:00etarako, ihoteetako pertsonaien etorrera jasoko zuen plaza erdiaren hesitura jendez lepo zegoen. Goxo egoten zen eguzkitan, baina ilunak traizioa egin dio egunari, eta bere legea inposatu du.
Borroka zerutiarra ematen ari ziren bitartean, azeri dantza ikusteko aukera izan da, Oiartzungo puntualitateak aginduta, puntu-puntuan.
Ikusmina zegoen plaza bete duten ehunka oiartzuar eta kanpotarren artean. Sorginak agertu dira lehendabizi, Fermiñeneko leiho batean. Legarreko maldatik jaitsi dira, ondoren, intxixuak. Horiek ere Oiartzungo meridianoarekin jarrita zuten erlojua.
Banderen dantza egin ondoren, auzolanean, udaletxea hartu dute. Beraiena izango da eraikina asteburuan.
Murrizketarik gabeko festa hasi da. Norberak jarri beharko dio muga bere buruari.
