Gobernu taldea: "Egoiliarrentzako zona berriak azterlan baten ondoren sortu dira"
Argazkian: Jesus Mari Martiarena (Lezoko alkatea), Igor Ugarte (Udaltzainburua) eta Joxean Sanchez (Ingurumen zinegotzia). Lezoko gobernu taldeak (EAJ eta PSE-EE), EH Bilduk egindako kritikei erantzun die. Zehazki, aparkaldi mugatuaren gainean udalbatzarrean onartutakoei buruz koalizioak esandakoak erantzun ditu. EH Bilduren kezka nagusia da aparkaldi mugatuko neurriek ez zutela atzean azterketarik. “Egoiliarrentzako zona berriak azterlan baten ondoren eta lezoarren onurarako sortu dira”, esan dute gobernukideek.
Jesus Mari Martiarena eta Joxean Sanchez buru diren bi udal taldeek oroitarazi dute 2022ko maiatzean onartu zela Lezoko Mugikortasun Iraunkorrerako Plana, “plan hori egiteko aurre-diagnostiko bat eta mugikortasun diagnostiko bat hartu ziren abiapuntu”, zehaztu dute gobernu taldekoek: “Fase bakoitzean bizilagunen iritziak eta ekarpenak hartu ziren kontuan”. EH Bilduk plan horren alde egin zuela azaldu dute, “eta azterketa sakon bezala kalifikatu zuen. Paradoxikoa da udal-talde horrek hilabete batzuk geroago baieztatzea ez dagoela azterketarik udalerrian aparkatzeko premiei buruz, ezta har daitezkeen konponbideei buruz ere”.
2022an onartu zen plan horren barruan, herritarrei 460 inkesta egin zizkietela jakinarazi dute gobernukideek, eta aldi berean, plana egin zuen enpresak (Ingartek) aurretik zeuden azterlanak, trafiko datuak, aparkatzeko guneen informazioa eta beste hainbat aldagai erabili zituela agiria osatzeko. “Prozesuan, lezoarrek adierazi zuten herriko arazo nagusia aparkalekurik ez egotea zela, eta plaza gehiago eskatzen zituzten, bai eta lehendik zeudenen kudeaketa aldatzea ere: egoiliarrentzako plazak, Lezoko herritarrek erabiltzeko eta gozatzeko lurzoru publikoari balioa emanez”. Plan hori Lezoko Udalaren webgunean kontsulta daiteke.
Altzate eta Arraitoki
Udal gobernuak onartutako aparkaleku mugatuaren neurriak egokiak direla baieztatzeko, adibide bat eman dute: “Lezoko Udaltzaingoarekin lankidetzan azterlan bat egin zen eta ikusi zen Altzate igerilekuko parkinean eta Arraitokin aparkatzen ziren Lezoko ibilgailuen ehunekoa oso txikia zela; %5,9 baino ez igerilekuen inguruan, eta % 47,7 kiroldegiaren ondoan. Gune horiek argi eta garbi Errenteriako pertsonek erabiltzen dituzte aparkatzeko. Egindako zenbaketan, igerilekuaren inguruko plazen ia erdia betetzen zuten, eta bostetik bat kiroldegiaren inguruan”.
Aldez aurretik jakinaraziko dute noiz eska daitekeen egoiliar txartela
Lezoko Udalak zehaztu du aparkaldi mugatuko eremuetan autoa utzi ahal izateko beharrezko izango den txartela noiz eska daitekeen aurrerago jakinaraziko duela. Eremu horiek Polentzarrene, Guillermo Lazon eta Hipolito Gezala kaleak dira. Gainera, Zubitxo kalean eta Elias Salaberrian egoiliarrentzako bi aparkaleku sortuko direla azaldu du udalak, eta horietarako ere txartela beharko dutela autoen jabeek.
Jakinarazpen hori bando bidez eta udalaren webgunean jendarteratuko dutela adierazi du udalak. Sare sozialen bitartez, baita komunikabideen bidez ere helaraziko du informazioa: “Oraindik ezin da izapide hori egin, aurretik ordenantza jendaurrean jartzeko izapideak egin behar direlako, behin betiko onartzeko”.
