Udala, aurki, "goiko auzoetatik hurbilago"
Beraungo eskolaurre zaharra herritarren arretarako bulego eta gizarte zerbitzuetako dotazio bihurtzeko lanean ari dira. Aizpea Otaegi alkateak eta Eneko del Amo zinegotziak obrak bisitatu dituzte.
Aizpea Otaegi alkateak eta Eneko del Amo Hirigintza zinegotziak Beraunen izan dira gaur, auzoko eskolaurre zaharrean egiten ari diren obrak bisitatzen. Herritarren arretarako bulego berria eta gizarte zerbitzuetako dotazio bat eraikitzen ari dira bertan. Aldakoenea kaleko 2. zenbakian dago eraikina.
ZU! Zure Udala herritarren arreta zerbitzuaren bulego berria izateaz gain, Gizarte Zerbitzuetako gizarte langileen talde bat ere ariko da lanean bertan. Eraikin berri honekin “baldintza sozialak hobetzeko zerbitzuak” eman nahi dituzte, udalaren zerbitzuak “irisgarriagoak” eginez. Izan ere, Beraun, Kaputxinoak, Alaberga eta Galtzarabordako goiko aldeetan bizi diren biztanleen zati handi bati emango dio zerbitzua etorkizuneko eraikinak.
Eraikin honekin agintaldi planeko konpromisoa betetzen dutela gaineratu du alkateak, “proiektu oso garrantzitsua” dela esan du. 1,3 milioi euroko aurrekontua du proiektuak eta udazkenerako martxan egotea aurreikusi dute, lanak “martxa onean” doazela esan baitu Otaegik.
