[Galeria eta bideoa] Agur ihoteei, gonbidatu bereziarekin
Intxixu, basandere eta sorginek udaletxea utzi dute, festa giroa ezarri eta gero. Aurreko urteetako espiritua berreskuratu da.
Festari agur esan zioten atzo arratsean. Kito. Bukatu dira aurtengo ihoteak. Intxixu, sorgin eta basandreek Oiartzungo udaletxea utzi zuten, herrian arrasto ederra utziz.
Murrizketarik gabeko azkeneko festa 2020an egin zuten, eta asteburu honetan orduko espiritua berreskuratu dute ihoteekin gozatzeko aukera izan dutenek.
Neguan egon daitekeen eguraldirik onena izan dute lagun festak iraun dituen intentsitate handiko 48 orduetan.
Atzo arratsaldean plazan elkartu ziren berriro, agur esateko. Ostiralean bezala, ehunka lagunek bete zuten ihoteen erdigune neuralgikoa izan dena.
Intxixu, basandere eta sorginen fantasiari gonbidatu distopikoa gehitu zitzaien atzo. Zoriaren apetak hala suertatuta, Starlinken sateliteen errenkadak Oiartzungo zerua zeharkatu zuten, han bildu ziren askoren harridurarako.
Agian ihoteen magiak erakarrita pasatu ziren bertatik. Sorginkeria hori Kataxulo haitzulora bueltatuko da. Ea datorren urtean magiak berdin funtzionatzen duen, gainditzea ezinezkoa izango baita.
