Gabierrota pasealekuaren "potentzialtasuna handitzeko" proposamena aurkeztu dute
Ia 300 metroko luzerako eta hektarea erdiko azalera duen pasealekua birgaitzeko proposamena aurkeztu du udalak. Eremu "erakargarriago eta seguruagoa" egin nahi dute.
Udaleko ordezkariekin batera izan dira auzo elkartekoak. Gabierrota pasealekuak, aurki, itxura berria izango du. Izan ere, udalak ia 300 metroko luzerako eta hektarea erdiko azalera duen pasealeku hori birgaituko du. Proposamen bat aurkeztu berri dute, “pasealekuaren potentzialtasuna handitzeko” asmoz. Eremu “erakargarriago eta seguruagoa” egin nahi dutela azaldu du Aizpea Otaegik gaurko agerraldian, “udalerriko gune garrantzitsuenetakoa” baita.
Pasealekuko egungo jardinerak kenduko dituzte, eta pasealekuaren erdialdean eta Jesusen Bihotza egoitzaren kanpoaldean egoteko eta elkartzeko espazioak eraikiko dituzte, ekipamendu eta hiri altzari berriekin. Oiartzun ibaiarekiko harremana ere hobetu nahi dute, “ibilgura iristea erraztuz”. Hala, beste arrapala bat eraikiko dute adinekoen egoitzaren parean.Berdeguneen azalera handitzea ere jaso dute proposamenean, %36 handitzeko asmoa du udalak.
Proposamena Gabierrotako auzo elkartearekin eta Jesusen Bihotza egoitzako arduradunekin elkarlanean landu du udalak. 2019-2023 Agintaldirako Planean jasotako proiektuetako bat da, eta 800.000 euroko aurrekontu partida izango du. Obrak 2023ko bigarren seihilekorako lizitatzea aurreikusi dute, eta obrak aurten hasiko direla aurreratu du alkateak.
