'Fakturen Optimizazioa' hitzaldi praktikoa, Lurgorri elkartearen eskutik
Elektrizitate eta gas fakturak behar bezala interpretatzen irakatsiko diete bertaratutakoei. Asteartean izango da.
Lurgorri Kultur Elkarteak beste hitzaldi bat antolatu du, iaz hasitako zikloaren laugarren atalari dagokiona. Fakturen Optimizazioa izenekoa egingo dute datorren asteartean (hilak 28), Reyna Aretoan. Oarsoaldea Garapen Agentziaren laguntza jaso dute antolaketarako.
Saio honetarako, “puri-purian” dagoen gai bati heltzea erabaki dute: argiaren eta gasaren prezio altuari buruzkoa. Hitzaldi praktikoa izango dela aurreratu dute antolatzaileek. Elektrizitate eta gas fakturak behar bezala interpretatzen irakatsiko diete bertaratutakoei. Faktura horien zenbatekoa murrizten laguntzeko jarraibideak emango dituzte eta kontsumitzaile kalteberenentzako laguntzen berri ere emango dute bertan.
Ez da aldez aurretik izena eman beharko.
Azken Borondateak, bukatzear
Era berean, elkarteak jakinarazi du Azken Borondateak izeneko tailer praktikoan parte hartu zutenek hitzordua izango dutela datorren martxoaren 2an (osteguna da). Lurgorri Elkartearen egoitzan bilduko dira, 19:00etatik aurrera.
