Herriko igogailuen erabilera, goraka
Bataz beste, urtean 3.000.000 bidaia egiten dituzte herritarrek. 13 igogailu ditu herriak egun, eta udaberrirako bi berri izango ditu.
![](https://oarsoaldea.hitza.eus/site/files/2020/07/beraungo-igogailua-4.jpg)
Errenteriako Udalak hiriko igogailuen erabileraren datuak eman berri ditu. Bataz beste, urtean 3.000.000 bidaia egiten dituzte herritarrek, egun dauden hamahiru igogailuetan.
Datuei erreparatuta, 2021ean 3.156.368 bidaia zenbatu zituzten, eta 2022an aldiz, 3.326.315. Igoera “garrantzitsua” izan dela diote udaleko iturriek, kontuan hartuta Touring etorbidekoa hilabete batzuetan geldirik izan dela. Igoera horren zati handi bat 2022ko urritik abendura arte eman zen. Hilabete horietan 2021ean baino 100.000 bidaia gehiago egin ziren (%12,74ko igoera).
Gorakada hori igogailuen ordutegi berriarekin bat etorri dela erantsi dute (iazko urrian ezarri zuten ordutegia). Izan ere, asteko egun guztietan erabilgarri izan dira, 6:00etatik 1:00ak arte. Udaleko iturriek gaineratu dute bandalismoa ez dela handitu ordutegi berria jarri zenetik, “herritarrek ondasun publiko horiek zaintzeko kontzientzia dutelako, eta Udaltzaingoarekin konektatuta dauden grabazio kameren bidezko kontrolengatik”.
Igogailuen aldeko apustuarekin jarraitzeko asmoa du udalak. Horregatik aurtengo udaberrirako beste bi berri izango ditu herriak, Beraunen hain zuzen. Orotara, udaberrirako hamabost izango dituzte erabilgarri herritarrek. Hauez gain, aurten bertan Gaztañokoa eraikitzea aurreikusi dute.