Gatazka komunitarioen bitartekaritza zerbitzu berria sortu du udalak
Zaratak, animaliek, usainek eta abarrek eragindako eragozpenak zein harreman gatazkatsu edo zailak artatuko dituzte zerbitzuaren bitartez. Datorren ostegunean jarriko dute martxan.
Mikel Amenabar udaltzaina, Aizpea Otaegi alkatea eta Bernar Lemos zinegotzia, gaurko aurkezpenean. Bitartekaritza eta bizikidetza zerbitzu berria aurkeztu du gaur udalak, “bitartekaritza profesionalaren bidez auzo eta komunitate gatazkei edo espazio publikoan sor daitezkeenei erantzuteko helburuarekin” sortu dutela esan du Aizpea Otaegi alkateak. Modu pilotuan jarriko dute martxan zerbitzua.
Ondorengo ideiatik abiatu dira zerbitzua sortzeko, hori azaldu dute gaurko agerraldian: “elkarrizketa, negoziazioa eta akordioa lantzea onuragarria dela gatazkak konpontzeko modu gisa, eta, aldi berean, aniztasuna onartuz elkarrekin bizitzearekin zerikusia duen irtenbideen partaide egiten gaituela”.
Hala, zaratak, animaliek, usainek eta abarrek eragindako eragozpenak zein harreman gatazkatsu edo zailak artatuko dituzte zerbitzuaren bitartez. Gatazka horiek kudeatu ditzan enpresa bat kontratatu du udalak, alkatearen arabera, “bitartekaritzan egiaztatutako profilak eta esperientzia handia dituena”.
Printzipio hauek izango ditu zerbitzuak: borondatezkotasuna, malgutasuna, konfidentzialtasuna, neutraltasuna eta inpartzialtasuna, eta lege esparruarekiko errespetua.
Datorren ostegunean (martxoak 2) jarriko dute martxan, eta ostegunero aurrez aurreko zerbitzua emango du, 12:00etatik 19:00etara, udaletxean. Hitzordua hartu beharko da aurretik, 943 44 96 00 telefono zenbakira deituta edota helbide honetara idatzita.
Udaleko arduradunek osatutako talde politiko-tekniko bat arduratuko da “artatzen diren kasuen jarraipen estua egiteaz eta horiek nola jorratzen diren zehazteaz”. Horrez gain, udalaz gaindiko beste zerbitzu batzuei dagozkien bideratzeak egiteaz ere arduratuko da talde hori, “egoki irizten zaienean”.
Zerbitzuari jarraitutasuna emateko modua “erabileraren, gatazka motaren eta lortutako emaitzen araberakoa” izango dela zehaztu du udalak. Zerbitzuaren ezaugarriak eta emateko modua, pilotua izanik, 2023ko urrira arte izango dira martxan.
Herritarrekin batera
Zerbitzu hau aktibatzeko herritarrekin parte hartze prozesu bat egin du udalak, etorkizuneko ordenantza zibiko eta bizikidetzakoak jaso eta jorratu beharko lituzkeen gaien inguruan hausnartzen aritu dira. Bilera hauetan herriko eragile, elkarte sozial eta auzo elkarteek parte hartu dute. 2021eko irailetik 2022ko ekainera luzatu dute prozesu hori. Alderi guztietako ordezkariak bertan izan dira, entzule gisa. Partaide guztiek “prozesuarekiko konpromiso handia” erakutsi dutela erantsi du Otaegik.
