[Bideoak] Azken agurra egin diote Mikel Martini
Dozenaka eta dozenaka senide, lagun eta burkide gerturatu dira gaur Zentolen tanatoriora, Mikel Martin Conderi azken agurra egitera. Ekitaldi hunkigarria izan da.
Senide, lagun, hamaika borroketako kide… Dozenaka eta dozenaka herritar gerturatu dira gaur goizean Zentolen tanatoriora. Azken agur beroa egin diote Mikel Martin Conderi. Bere ibilbide eta borroka omentzeko ekitaldi xumea egin dute.
Ikurrina, Errepublikako bandera eta ortzadarraren bandera batekin estali dute haren kutxa. Joxe Mari Karrerek hartu du hitza lehenik, biziki hunkituta, eta hari hartu diote lekukoa Oier Guillanek (poema batekin), Joxe Iriarte Bikilak Alternatibaren izenean, Itziar Ostolazak EH Bilduren izenean eta Euskal Herriko Sexu Askapen Mugimenduko kideek. Azken hauek “harrotasuna” hitza nabarmendu dute, ikusten baitute gazteek erreleboa hartu dietela Martinek eta beste askok hasitako bide eta borroka horri, “zerbait ongi egin dutenaren seinale” dela.
Martinen anai-arrebek eskerrak eman dizkiete guztiei, lehen eta orain jasotako maitasunagatik. Anaiak honakoa esan du: “Goazen gizarte madarikatu hau aldatzera, hori dela Mikelek egiten zuena”.
Internazionala, Eusko Gudariak eta Zutik Emakumeak kantatuz bukatu dute ekitaldia. Tanatoriotik jaitsi eta haren omenezko brindisa egin dute senide eta lagunek Zumardian.
Aurrerago egingo diote “merezi duen omenaldia”, hala jakinarazi dute haren gertukoek.
Joan den ostegunean zendu zen, 68 urterekin, uda aurretik diagnostikatu zioten gaixotasun bategatik.
