Okilak eta orientazio jolasa, martxoko protagonista Arditurrin
Datorren igandean, Aitor Lekuonak hegaztiei buruzko azalpenak emango ditu. Hilaren 26rako, 'Iparra galdu gabe'.
Arditurriko parketxeak bi jarduera antolatu ditu hilabete honetarako. Lehenengoa datorren igandean —hilak 12— izango da, okil beltzari buruzko saioarekin.
Aitor Lekuona Alzugarai Gipuzkoako Foru Aldundiko Basa Animali eta Landareen Zerbitzuko langilea izango da azalpenak emango dituena. POCTEFA Habios proiektuko kidea da, halaber, Lekuona. Espezie berezi horri buruzko hainbat argibide eman ondoren, okil beltzak jakiak lortzen dituen tokiak bisitatuko dituzte.
Arditurriko parketxeak adierazi duenez, Habios proiektuaren helburua da Pirinioetako mendilerroak hartzen dituen lurralde guztiekin lankidetzan aritzea, abifaunaren kontserbazioaren “basoko habitaten kudeaketaren “efizientzia” hobetzeko.
Aldez aurretik hartu beharko da tokia, toki mugatuak izango baitira. Prezioa 4 eurokoa izango da lau urtetik beherakoentzako, eta 6 eurokoa adin horretatik gorakoentzako.
Ibilaldia 10:00etan hasiko da, eta bi ordu iraungo ditu. Prismatikoak eramatea gomendatu dute.
Bigarren jarduera—Iparra galde gabe orientazio jolasa— hilaren 26an izango da, eta aurrerago emango dituzte xehetasunak.
