[Galeria eta bideoa] Herriko kaleak oihuz eta aldarrikapenez bete ditu Zirikak
Herriko dozenaka eta dozenaka neska gazte batu dira Martxoaren 8ko mobilizaziora. Argazki galeriaz gain, bideo bat ere egin du bertan HITZAk.
Dozenaka eta dozenaka neska gaztek herriko kaleak aldarrikapenez bete dituzte gaur goizean, Zirika Neska Gazte Taldeak Martxoaren 8rako deitutako mobilizazioan. Bukaerako ekitaldian esan dutenez, “sistema zisheteropatriarkal kapitalista eta kolonial honen aurka borrokan gaudela eta borrokatzen jarraituko dugula aldarrikatzeko” probestu dute aurtengoa.
Zaintza lanak “feminizatuak eta interes pribatu eta merkantilisten esku” daudela ere esan dute. Hauek, “balioa ukatuta dutenak eta ezinbestekoak direnak, soilik emakume eta neska gazteok betetzen” dituztela erantsi dute, “askotan doan edo prekarizatuta, baina beti ezkutuan, ikusezin”.
Nazkatuta daudela oihukatu dute: “Gure bizitzak duinak izan daitezen ezin dugu lan hau modu esplotatuan egiten jarraitu. Denok, gizonek, erakunde publikoek eta enpresek erantzukizuna hartzeko momentua da. Denon bizitzak erdigunean jar daitezen zaintza sistema honekin bukatu behar dugu eta neska, gazte eta ikasleok borrokan jarraituko dugu, esplotatu nahi gaituen sistema honen aurrean erradikaltasunez erantzunez, sistema honetan elkar zaintzea erradikala delako”.
Jarraian gaurko mobilizazioan HITZAk ateratako argazki sorta, eta egindako bideoa:
