[Galeria eta audioa] "Segi lanean, eta gora borroka feminista!"
Handia izan da Lezoko Martxoaren 8ko mobilizazioa. 500 inguru izan dira herriko martxa morea aldarrikapenez josi duten lezoarrak.
Jendetza, handia gainera. Martxoaren 8ko manifestazioa egin dute gaur arratsaldean Lezon, Lezoko Emakume Taldeak eta Gaxuxa Emakume Taldeak deitutakoa. Lezoko Udaltzaingoarekin eta deitzaileekin HITZAk kontrastatu dituen datuen arabera, 500 bat lezoar izan dira deialdiarekin bat egin dutenak. Jendetza emakumeen eskubideen alde, gaurkoan, zaintza oinarri. Denon bizitza erdigunean pankartak zabaldu du gaurko mobilizazio handia. Behean dagoen irudi bilduma gaurkoan Lezok bizi izan duenaren zati bat da. Bihar, mobilizazioaren xehetasunekin bideoa zabalduko du OARSO BIDASOKO HITZAk.
Gurutze Santuaren plazan bildu dira lezoarrak Emakumeen Eguneko martxarekin bat egiteko. Herri osoari bira eman, eta Karlos Saldise plazan bukatu dute bidea. Martxa hasi aurretik, egunaren irakurketa egin dute antolatzaileek. “Emakume langileak beste sistema bat eraikitzeko bidean aspaldi hasi ginen. Eta gaur ere soldata arrakala hausteko eta zaintza sistema berri bat eraikitzeko asmoarekin atera gara kalera. Jendartean ematen diren botere harremanak eraldatzeko proposamena da gurea. Erakundeek, herri mugimenduek, norbanakoek eta komunikabideek behingoz erabaki sendoak hartu behar ditugu, baldin eta aldaketa sozial eraginkor bat lortu nahi badugu”, esan dute.
Horri begira, Lezon ere denen arteko elkarlana ezinbestekoa dela adierazi dute, “mahai batean eseri eta berdintasunean oinarritutako herri baten aldeko apustua egin behar dugu. Guk, behintzat, horretan jarraituko dugu. Segi lanean, eta gora borroka feminista!”.
Horren jarraian, eta trikitilariek lagunduta, martxa moreak Lezo hartu du. Borroka feministaren aldeko oihuak zabaldu dituzte, benetako berdintasunaren aldekoak, zaintza sistema eraldatzeko eskaera ere egiten zutenak.
Saldise plazan etentzat eman dute ibilaldia. Ez da bukatu, ordea, mobilizazioa. Han, txalaparta doinuen ondoren, Bilgune Feministaren eta hainbat olerkariren testuetan oinarritutako mezua zabaldu dute emakume gazteek (behean horren audioa). Ondoren, Murixka Dantza Taldeko kideen emankizuna jaso du bor-bor zegoen plazak. Handia izan da gaurkoa. 2023ko Martxoaren 8a gogoratzekoa izango da.
- Audioa: Karlos Saldisen zabaldu den mezua (klik egin hemen entzuteko).
- Bisita ezazu HITZAren Martxoaren 8ko atal berezia.
