[Bideoa] Greba orokorra prestatzeko aktibatzera deitu dute
Ehunka lagunek bat egin zuten Oiartzungo Feministen Asanbladak deitutako manifestazioarekin. Bertako irudiekin bideoa egin du HITZAk.
Oiartzungo Feministen Asanbladak deituta, ehunka oiartzuarrek bat egin zuten bestelako zaintza sistema baten aldarriarekin. Zaintza “gizarte osoari” dagokiola esan zuten, eta erakunde publikoek, merkatuak zein komunitateak zaintza egituraren katebegi bihurtu behar dutela adierazi zuten.
Urtea bukatu baino lehenago mugimendu feministak greba orokorrera deituko duela iragarri zuten. Mobilizazio ziklo berri horretarako “aktibazioa” eskatu zieten feminista guztiei. Borrokarako egun hori “inflexio-puntua” izatea nahi dute.
“Egungo zaintza erregimen kapitalista eta patriarkala irauli nahi ditugu dena aldatzeko”, zehaztu zuten.
Atzoko mobilizazioaren nondik norakoei dagokienez, zaintzaren arloan lan egiten duten eragileek beraien ahotsa eraman zuten. Geldialdiak egin zituzten ibilbidean zehar, eta bukaeran zinta-dantzarekin zaintzaren arloko saretzearen beharra islatu zuten.
HITZAk bertako irudiak hartu zituen, eta bideo eta galeria bana [azpian] osatu ditu.
