Adingabe transexualen gaia mahai gainean jarriko du Lurgorrik
Naizen elkartearen hitzaldia antolatu du Lurgorrik datorren astearterako. 19:00etan izango da Reyna aretoan.
Lurgorri elkartearen aurreko agerraldi bat Adingabe transexualen eta haien familien gaia jorratuko du datorren asteartean Lurgorri elkarteak antolatu duen hitzaldian. Naizen elkartea gonbidatu du horretarako. “Hitzaldiaren bidez, adingabe transexualen eta haien familien errealitatea ezagutarazten lagundu nahi dugu, baita haien eskubideak eta aldarrikapenak zabaltzen ere”, azaldu dute.
Gaurkotasun beteko gaia aukeratu du elkarteak, aurretik antolatu dituen hitzaldietan egin duen moduan. Joan den otsailean transen berdintasun erreal eta efektiborako eta LGTBI pertsonen eskubideak bermatzeko lege proiektua onartu zuten Espainiako Kongresuan.
Lurgorri elkarteak hitzaldia aurkezteko gaur egin duen agerraldian azaldu duenez, aurreiritziz eta buloz betetako diskurtsoak baztertuta ikusarazi nahi dute trans adingabeen eta haien familien errealitatea.
Beatriz Sever Naizen elkarteko sexologoak hartuko du parte hitzaldian eta harekin batera hainbat senidek. Asteartean izango da hitzaldia 19:00etan reyna Aretoan. Bertaratzea librea izango da lekuak bete arte.
“Hamar urtetik gora daramatza Naizen elkarteak lanean, haur eta gazte transexualen familiei transexualitatearen gaineko laguntza eta heziketa eskaintzen—azaldu du Lurgorrik—eta helburu nagusien artean, adin txikiko transexualen eskubideen eta interesen defentsa eremu guztietan eta horien onerako egokiak diren legezko erreformen sustapenean eragitea aipatu behar dira”. Horrekin batera, hezkuntzan eta haur eta gazte transexualekin esku hartzen duten profesionalentzako trebakuntza eskaintzen duela elkarte horrek eragin eremua duen hego Euskal Herrian, erantsi du Lurgorri elkarteak.
