[Galeria eta bideoa] Herriarentzako izango den lau zutabedun eraikina
Gaur inauguratu dute Landetxe eraikina. Kultura, euskara, jubilatuen txokoa eta ongizatearen gainean eraikitako "herriaren palazioa" izango da.
Kultura aretoa goraino bete dute oiartzuarrek, jakin-mina asetzeko. Iritsi da hainbeste itxarondako eguna. 2016an hasi zen —orduan Mendiburu 14 izenarekin— Landetxe eraikinaren proiektua. Gauza asko pasatu dira ordutik —tartean pandemia bat—, baina 400 bat lagunek esan dezakete “Ni Landetxen egon naiz”.
Ekitaldi arina egin dute inauguratzeko. Saioa Alaia Martinek jarri duen off ahotsak gidatu du, Landetxe eraikinaren papera jokatuz. Lehenik eta behin, Jexux Leonet alkateak eta Eneritz Arbelaitz alkateordeak hartu dute hitza.
Eskerrak eman dizkiete ekarpena egin duten guztiei. Adierazi dutenez, Oiartzungo Udalarentzako obra bera baino garrantzitsuagoa izan da proiektua herritarrekin partekatzea.
Landetxeren lau zutabeei errepasoa eman diete: eraikinak jasotzen dituen kultur aretoa, jubilatuen egoitza berria, euskalgintzaren txokoa eta azken horren mugitzeak Gizarte-Ongizate Sailari Fermiñene libre uztea.
Orain “edukiz bete” behar den eraikina dela zehaztu dute, eta “ziur” daude herritarren konpromisoarekin hala izango dela. “Zuek zarete herri hau mugitzeko indarra, eta eraikin honek herri hobe bat egiteko tresna berri bat emango digu”, gaineratu dute.
Landetxe eraikina dagoen tokian, XVIII. mendean, urdiñolatarren palazioa zegoela gogorrazi dute Arbelaitz eta Leonetek. “Orain, beste palazio bat egin dugu hemen, euskararen, kulturaren, ongizatearen eta zaintzaren palazioa. Guztion artean zaindu eta bizia eman behar diogu honi”.
Lau zutabeak
Udaleko ordezkarien hitzartzearen ondoren, eraikinari metaforikoki eusten dioten lau zutabeak irudikatu dituzte hainbat arte diziplinarekin.
Karmele Mitxelenak zahartzaroari buruzko errima-jolasa egin du, Elixabete Barandiaran dantzariak gorputz-adierazpenez islatzen zuen bitartean.
Maider Zabalegik, Gorka Urra eta Urbil Artolarekin batera, Soinu txikia kanta abestu dute, Edurne Agirrezabala aktoreak publikoaren artean ongizatea banatzen zuen bitartean.
Ondoren, Ane Badiola, Irati Odriozolak eta Jon Martinek hirugarren horrek prestatutako bertso-sorta kantatu dute, Arrosako Zolan, Igor Arruabarrena gitarristarekin laguntzarekin. Euskara eta euskalgintza izan dituzte hizpide.
Azkenik, Iraia Etxebeste eta Ainara Lasak manifestu bat irakurri dute, herriko kulturgintzan martxan dagoen eraldaketari buruzkoa. Agertokia ispilua dela esan dute, eta Oiartzun bera dela antzokia.
Jurdana Otxoaren biolinaren akordeek barruko ekitaldia eta kanpoko antzezlanaren zubi-lanak egin dituzte. Kanpoan, Luix Mitxelenak, Karen Muñozek eta Lohizune Telletxeak umorezko antzerki pieza jokatu dute, eta ondoren Olatz Mitxelenak kultura definitzeko irakurraldia egin du.
Azkenik, lehenago banatu dituzten pegatinetan norberarentzako kultura zer den idaztera gonbidatu dute, eta paretetan itsastera. Kultura, ongizatea eta euskara Oiartzundik zabaltzen ari da.
