Bi final handi eta hiru txapela jokoan
Yorelek eta Rubenek Ohorezko Mailako Larruzko Paletako Euskal Ligako txapelak izango dituzte jokoan; Eskuz Banakako Lehen Mailako Trinkete txapelketa jokatuko du Ibon Tabernak.
EPLEko pilotariek bi hitzordu garrantzitsu dituzte bihar, izan ere, bi final handi jokatuko dituzte. Gasteizko Lakua Pilotalekuan 10:00etan hasita Yorelek eta Rubenek Ohorezko Mailako Larruzko Paletako Euskal Ligako txapelak izango dituzte jokoan. Aurrez aurre, Sestaoko Lagun arteko klubeko palistak.
Bigarren hitzordua, hura ere garrantzi handikoa, Irurako trinketean, 18:00etan hasita. Azken horretan Eskuz Banakako Lehen Mailako Trinkete txapelketa jokatuko da, eta Ibon Taberna txapela lortzen saiatuko da.
Une ezin hobean daude hirurak, baina final orekatuak aurreikusi dira, aurkariek ere maila bikaina erakutsi baitute txapelketan barrena. EPLEk etxean nahi ditu hiru txapelak, eta ziur Yorel, Ruben eta Tabernak ez dutela amore emango, orain arte bezala bikain arituko direla kantxan txapel horiek soinean ekartzeko.
