Oiartzo ezagutzeko ate irekien eguna izango da hilaren 16a
Familientzako ate irekien saioak antolatu dituzte ostegunerako, eta hil bukaeran irekiko dute aurrematrikula egiteko epea, apirilaren 21era arte.
Oiartzoren instalazioak ezagutzeko aukera izango da ostegunean. Oiartzo batxilergo-ikastolak familientzako ate irekien jardunaldia antolatu du datorren ostegunerako, hilak 16. Horrez gain, jakinarazi dute aurrematrikula egiteko epea hilaren 27tik apirilaren 21era izango dela.
Gaineratu dutenez, ostegunekoa ikastola ezagutu eta zalantzak argitzeko saioa izango da. Ez da beharrezkoa izango aldez aurretik hitzordua hartzea.
Bere hezkuntza-eskaintza zein den gogorarazi dute: “Oiartzok batxilergo-modalitate nagusiak eskaintzen ditu, osteko edozein ikasketetarako sarbidea ahalbidetuz. Horrez gain, Oiartzon ikasleek beren interesen arabera aukera ditzakete aukerako gaiak, modu guztiz askean”.
Bi hamarkadatik gorako ibilbidea
Gogorarazi dutenez, 1990eko hamarkadaren bukaeran Oiartzungo Haurtzaro eta Errenteria-Oreretako Orereta ikastolek sortu zuten Oiartzo. Honakoa izan zen helburua: “Bi ikastoletako ikasleei zein eskualdeko gazteei batxilergo euskalduna, hurbila, kalitatezkoa eta aukera zabalekoa eskaintzea”.
Oiartzo ere Euskal Herriko Ikastolen Elkarteko kide gaineratu dute, “kalitatezko euskarazko hezkuntza berritzailearen berme”. Lantaldeak “gaztetasuna eta esperientzia” uztartzen dituela zehaztu dute, eta horren guztiaren isla “ikasleen emaitzak” direla.
Informazio gehiago topa daiteke Oiartzoren webgunean.
