'ETAren agiri bulegoa' ikusteko aukera, Landetxen
Giltxikaro antzerki taldearen antzezlana igandean emango dute, eta sarrerak online eros daitezke. Datorren astebururako, Ander Iriarteren 'Karpeta urdinak'.
Ane Zabala eta Galder Perez dira aktoreak. Asteburuko inaugurazio ekitaldien ondorengoak pasatuta, Landetxe eraikineko kultura aretoa hasi da ohikoa izango den programazioa eskaintzen.
Datorren iganderako ETAren agiri bulegoa dago programatuta. Oiartzungo Antzerkizaleen Elkartearen urteko egitarauaren barruko saioa izango da. 19:00etan hasiko da antzezlana, eta sarrerak online eros daitezke, 8 euroan. 60 sarrera gordeko dituzte egunean bertan leihatilan saltzeko.
HITZAk bi sarrera zozkatu ditu emanaldi horretarako.
Honakoa da ETAren agiri bulegoa antzezlanaren sinopsia:
Petral Bilbao ETAren agiri bulegoko langilea da: ETAren zigiluak banatzea da bere eginkizun bortitza. Makal Xiberu bulegora joan da, eginkizun sekretu batekin. Petralek, ordea, arnasa hartzeko denborarik eman gabe, ezustean harrapatuta, Makali ETAren agiria lortzeko probak ezarriko dizkio.
Karpeta urdinak
Hurrengo astebururako proposamena, berriz, Ander Iriarteren Karpeta urdinak dokumentala izango da. Emanaldiaren ondoren zuzendari oiartzuarrarekin solasaldian aritzeko aukera egongo da.
Saioa larunbatean —hilak 25— izango da, 18:00etan hasita. Sarrera horiek ere bai online eros daitezke. Egunean bertan saltzeko beste 60 sarrera gordeko dituzte.
Honakoa da dokumentalaren sinopsia:
Anderrek susmatzen du, beste askok bezala, aitak komisarian jasan zuena tortura izan zela. Bere susmoa argitu nahian, Eusko Jaurlaritzak egindako “1960tik 2014ra bitartean Euskal Autonomia Erkidegoan gertatutako tortura eta tratu txarrak ikertzeko proiektua” ezagutuko du.
Ikerketa honek argitaratzen dituen emaitzekin, proiektuan parte hartu zuten mediku, psikologo, psikiatra eta abokatuen eskutik tortura psikologikoa, Istanbulgo Protokoloa edo hurbilketa estatistikoa bezalako kontzeptuetan sakonduko du, ipar globaleko torturaren errealitatea ezagutaraziz.
