Udalak Gazte Izanak-ekin hitzarmena sinatu du
Aisialdi aktiboa eta jubilatuen integrazioa sustatzeko 15.000 euro jasoko dituzte urtero. Landetxen irudikatu dute akordioa.
Fermin Lorza Gazte Izanak-ekoa eta Jexux Leonet alkatea, elkarri eskua ematen. Oiartzungo Udalak eta Gazte Izanak jubilatuen elkarteak hitzarmena sinatu dute. Akordio hori atzo irudikatu zuten, Landetxe eraikin berrian; bertan joango da jubilatuentzako egoitza berria.
Gazte Izanak elkartearen estatutu berriak onartzeko batzarra egin zuten atzo. 200 erretiratu elkartu ziren, eta aurrerantzean izango dituzten arau berriak adostu zituzten.
Jexux Leonet alkateak estatutu berriak onartzerakoan izandako “kontsentsu zabalagatik” zoriondu zituen jubilatuak. Bere ustez, gainera, “pozik egoteko eguna” izan zen atzokoa, “urte luzez amestutako” egoitza izango baitute.
Diru-laguntza
Udalak urtero 15.000 euroko diru-laguntza bideratuko dio Gazte Izanak-i, ekintzak antolatzeko, aisialdi aktiboa sustatzeko eta jubilatuen gizarte integrazioa garatzeko.
Beharko balitz, kopurua igotzeko konpromisoa hartu zuen alkateak, udalaren izenean. “Zuen esku dago. Oiartzungo jubilatuen egoitzak bizia duen bitartean eta aktibo dagoen bitartean, Udalaren aldetik konpromisoa osoa izango da, bai ekonomikoa eta baita elkarlanerakoa ere”, zehaztu zuen.
Horrez gain, egoitza berria estreinatuko dute, orain dela bi aste inauguratutakoa. Hori diseinatzeko parte-hartze prozesu bat egin dute. “Zuek esandako beharren baitan egin dugu zuen egoitza berria”, esan zien alkateak.
Egoitza berrian proiektu asko txertatuko direla gaineratu zuen alkateak, gehienak zaintzarekin lotutakoak. Izan ere, zaintza “erdigunean” jarri nahi du udalak.
Herriko jubilatuen edo haiekin lan egiten duten elkarteek kudeatuko dute espazioa hori. Egoitza berria elkarrekin konpartitu eta proiektu bateratuak aurrera eramateko dei egin zien alkateak. Udalarentzako “oso garrantzitsua” da jubilatu aktiboak izatea.
Fermin Lorza Gazte Izanak-eko presidenteak esker oneko hitzak izan zituen. “Emango diguten diru kopurua oso garrantzitsua da. Eskatu dugun guztia eman digute eta gure beharrak ulertu era erantzuteko prestutasun osoa izan dute”, adierazi zuen Lorzak.
Hitzarmena sinatu ondoren, jubilatuek askari batekin gozatzeko aukera izan zuten.
