Autobus linea zabaltzea txalotu du udalak, baina gehiago eskatu du
Autopistaz lotura zuzena egingo duen linea berria eskatzen jarraituko duela iragarri du udalak, Donostia erdigunera eta ospitalera.
Eneritz Arbelaitz, herriko autobus geltoki nagusian. Gipuzkoako Foru Aldundiak atzo iragarri zuen autobus zerbitzuan aldaketak egingo zituela. Ospitalera joango den autobus zerbitzua jarriko dute, eta Donostiara joaten den egungo linearen maiztasuna handituko da, 20 minututik 15era.
Oiartzungo Udalak adierazi duenez, beraien eskaera batzuk “aintzat hartu” ditu aldundiak. Izan ere, bi eskakizun egin izan ditu udalak: herria eta ospitalea lotuko dituena, eta herritik zuzenean doana.
Berritasunen balorazio positiboa egin du Eneritz Arbelaitz alkateordeak, baina “gehiago” egin beharko litzatekeela uste du.
Oiartzun 10.300 biztanleko herria dela gogorarazi du Arbelaitzek, eta orain zerbitzu “kaxkarra” duela. “Urte luzez egin dugun eskaera izan arren eta erabakia udal eta foru hauteskundeen bezperan hartu badute ere, positiboki baloratzen dugu neurria”, zehaztu du.
Autobusa ospitalera eramanda eta maiztasuna areagotuta, oiartzuarrek “merezi duten” garraio publikoa “gertuago” dagoela uste du Arbelaitzek.
Hobekuntza gehiagoren zain
Oraindik zer egina uste du Arbelaitzek. “Hasteko”, jarraitu du, “ospitalera joan den autobusak Errenterian geltokiak izango ditu. Ospitalera iristea zerbitzu azkarra izatea nahi dugu eta hori eskatzen jarraituko dugu”.
Gogorarazi duenez, Oiartzundik Donostiara doan E2 autobusak ere 45 minutu inguru behar izaten ditu ibilbidea egiteko. “Jendeak autobusa gehiago erabiltzea nahi badugu, Donostiara joateko edo handik itzultzeko denborak laburragoa izan behar du. Oiartzundik hiriburura autobidetik joango den zuzeneko zerbitzua jarri behar da”.
Bere esanetan, aldaketak “hobekuntza” dira, baina uste du gehiago egin daitekeela. Ospitalera eta Donostia erdialdera zuzenean doazen zerbitzuak jartzeko lanean segituko dutela adierazi du alkateordeak.
Bestalde, gogorarazi du Gipuzkoako Garraio Agintaritzan erabakitzen direla Mugi tarifak. “Garraio publikoa indartzeko ezinbestekoa da zerbitzua ona izatea eta prezio duinak izatea”, adierazi du.
Prezio horien eztabaidan “garraio publikoa merkea, justua eta eskuragarria” izateko lan egiten jarraitzeko konpromisoa berretsi du Oiartzungo alkateordeak.
