Ander Imaz: "Zuen berotasunarekin txapelduna sentitzen naiz"
Binakako Txapelketako garaipenaren ateetan gelditu da aurten ere Ander Imaz, Unai Laso bikotearekin. Lortutakoa, baina, ospatu dute.
Iazko arantza ezin izan du aurten ere kendu Ander Imaz pilotari oiartzuarrak, hura eta Unai Laso bikotea ezin izan baitziren nagusitu Aitor Elordi eta Jose Javier Zabaletaren kontra. Azken bikotea Binakako Txapelketako garaile suertatu zen atzo, Iruñeko Nafarroa Arena pilotalekuan lehiaturiko finalean.
Urdinek 13-22 irabazi zuten, hasieratik gailenduz markagailuan. Atzelari oiartzuarrak, dena den, lepo beteta zeuden harmailetatik jaso zuen bere herri eta klubeko kideen babesa, Oiarpek autobusa antolatu baitzuen pilotalekura. Norgehiagoka ikusi zutenek, eta horretarako aukerarik gabe gelditu zirenek ere, goren hartara heldu arte Imazek eginiko bide txukuna ospatu zuten gero, Egi-Luze sagardotegian.
Txapelik gabe heldu bazen ere, harrera jendetsua egin zioten ingurukoek pilotariari, elkarren segidako bigarren urtez lehiatu duen finala bukatuta. Esker onez mintzatu zitzaien bertaratutakoei Imaz, txalo zaparrada, agurra eta bertsoak jaso ondoren: “Lehenengo urtea berezia izan zen, eta hau ere berezia da. Bigarren finala. Nahiz eta txapelik ez lortu, zuen denon berotasunarekin txapelduna sentitzen naiz”.
Hona HITZAri bertan izandakoek helarazitako zenbait argazki, eta bideoa.
