Hamaika aukera gozatzeko Oarsoaldetik irten gabe
Errenteria-Orereta, Lezo, Oiartzun eta Pasaiak hamaika aukera eskainiko dituzte oporraldiaz gozatzeko. Horrekin lotuta, hainbat proposamen egin ditu Oarsoaldea Garapen Agentziak oporretan etxetik aterako ez direnei begira, inguruan dituzten aukerez goza dezaten.
Errenteria-Orereta, Lezo, Oiartzun eta Pasaiak hamaika aukera eskainiko dituzte oporraldiaz gozatzeko. Horrekin lotuta, hainbat proposamen egin ditu Oarsoaldea Garapen Agentziak oporretan etxetik aterako ez direnei begira, inguruan dituzten aukerez goza dezaten. Errenteria-Oreretan Jantziaren Zentroa aipatu du lehenik. Bertan L´atelier erakusketa ikusteko azken aukera dago. Gerra ostean joskintzan aritu ziren milaka emakumeei omenaldia den erakusketa hilaren 10era arte ikusi ahalko da. Sarrera doakoa da. Ordutegia Jantziaren Zentroa bisitatzeko, honakoa: hilaren 6,7,9, 10 eta 16, 11:00etatik 14:00etara. Hilaren 8an eta 15ean, 11:00etatik 14:00etara eta 17:00etatik 20:00etara. Museoa eta erakusketa orokorra bisitatzeko sarrerak 3 euro balio ditu, eta 5 urtetik beherakoek doan dute.
Bigarren proposamena Fanderiako errota ibaiaren etxea bisitatzea da. Bertako historia ezagutzearekin batera, errotarria martxan ikusteko aukera ere izango dute bisitariek. Ordutegia hilaren 6tik 9ra, 10:00etatik 14:00etara da. Sarrera beraz, doan da.
San Marko gotorlekua da hirugarren aukera. Bertan egin daitezken bisiten gaineko informazioa eta ordutegia hemen kontsulta daiteke.
Lezori lotutako proposamenean, kultura, natura eta gastronomia nahastu ditu Oarsoaldea Garapen Agentziak. Herrigune historikoa bisitatu beharrekoa dela esanda bere balio artistikoarengatik, Gurutze Santuaren Basilika aipatu du; bertan, Europan dauden hiru Kristo bizargabeetako bat dauka. Hiru mendi ibilbide, bizikleta alokairu zerbitzua bidegorri sarean barrena ibiltzeko, eta eguna borobiltzeko, kalitate ezin hobea duten erretegi, jatetxe eta tabernak nabarmendu ditu agentziak.
Oiartzunen, Arditurriko Bide berdea zeharkatzea aholkatu dute.Bide horretatik gertu, gainera, hiru museo: Soinuenea, mundu osoko 400 musika tresna baino gehiagorekin; Luberri, Euskal herriko geologiaren gaineko museoa; eta bide bukaeran Arditurrigo Meategiak. Tren berdea ere aipatu du Oarsoaldeak. Hilaren 15ean goizez, Pagoaldetik irten eta Arditurrira bidea egingo du, meategiak bisitatzeko aukerarekin. Prezio bereziak eskainiko dituzte opor egunetan. Informazio gehiago eskatzeko eta erreserba egiteko 943 49 50 69 edo 688 89 50 68 telefono zenbakietara deitu daiteke.
Oiartzungo Turismo Bulegoak gainera zabalik izango ditu ateak Arizmendienean hilaren 6tik 16ra. Etxea bisitatzeko aukera eskainiko dute bisita gidatuen bidez, baita Oarsoaldean dauden aukeren gaineko informazioa jasotzeko beta ere. Bertako telefono zenbakia , honakoa: 943 50 89 13.
Pasaian azkenik lau proposamen egin ditu agentziak. Pasai Donibaneko prozesio txikia da lehena; interes turistikoaren izendapena du eta Gipuzkoako hoberenen artean sailkatuta dago. Ostiral Santuan, 20:30ean ateratzen da kale nagusitik.
Hilaren 9an berriz, eleberrien ikuspuntutik Pasai San Pedro eta Pasai Donibanekoko txokoak ikusteko aukera izango da. Erreserbak 615 74 00 58 telefono zenbakira deituta egin behar dira.
Mater ontzi museo ekoaktiboak, bestalde, eskaintza zabala izango du oporraldian. Lonjara bisita egingo dute (hilaren 5ean), nabigazioak itsaslabarretik (hilak 6 eta 9an), itsas irteerak ilunabarrean eta itsas hondakinen arrantza (hilak 9) eta marinel tailerra (hilak 16). Informazio gehiago eta erreserbak egiteko 619 81 42 25 telefono zenbakira deitu behar da.
Azkenik, Albaola proposatu dute. Lanak direla eta ateak itxita egon ondoren, berriz zabalik da. Aurrez aurre, XVI. mendeko San Juan baleontziaren eraikuntza ikusteko parada izango dute bertaratzen direnek, bisita librean zein gidatuan. Informazio gehiago jasotzeko edo erreserba egiteko 943 39 24 26 telefonoz enbakira deitu behar da.