Osasun mentalari buruzko tailerra, hilaren 21ean
18 eta 30 urte arteko gazteei bideratutako tailerra emango du Ainhoa Urretagoienak, Xenpelar Etxean. Izena hilaren 19a baino lehen eman behar da.
Errenteriako Udalak jakinarazi duenez, hilaren 21erako —ostirala— Osasun mentala: zeure burua ulertzen ikasi izeneko tailerra antolatu dute.
Xenpelar Etxean izango da tailer hori, 17:30etik 20:30era bitartean. 18 eta 30 urte arteko gazteei zuzenduta dago, eta Ainhoa Urretagoienak emango du.
Gipuzkoako Foru Aldundiko Gazteria Zuzendaritzaren prestakuntza-eskaintzaren barruan kokatzen dela zehaztu dute.
Antolatzaileek adierazi dutenez, tailer horren bitartez gazteen osasun mentala hobetu nahi dute, baita norberak bere burua hobe ulertzea ere. Horrez gain, osasun mentalaren eta horren zaintzaren garrantziaz ohartarazi nahi dute.
Tailerra euskaraz izango da, eta parte hartu nahi duten gazteek hilaren 19a baino lehen eman beharko dute izena. Tokiak mugatuak izango direla adierazi dute. Izena emateko, esteka honetan klik egin eta galdetegia bete beharko da.
