Pikoketak Adrian Lopez omenduko du Errepublikaren Egunean
Militante sozialista eta errepublikazalearen ibilbidea aitortuko dute ostiral arratsean. Pikoketak kalejira egingo du, urtero bezala.
Adrian Lopez Villegas, 2019an egin zuten kalejira errepublikazalean [Pikoketak helarazitako argazkia]. Datorren ostiralean, apirilak 14, 92 urte beteko dira Espainiako Bigarren Errepublika aldarrikatu zenetik. Horren harira, Pikoketak ekitaldia antolatu du. Kalejira azkeneko aldiz 2019an egin zuten.
Kalejira egingo dute, Alabergako biribilgunetik hasita, eta Herriko Plazara arte. 18:30ean jarri dute zita, eta 19:15 aldera iritsiko dira bukaerara.
Adrian Lopez, omendua
Pikoketa elkarte errepublikazaleak urtero pertsona bat omentzen du, eta aurtengoa nor izango den iragarri dute. Adrian Lopez Villegas PSE-EEko militante eta Pikoketaren hastapenetan ibili zen kidea izango da, gerora elkarteak antolatutako ekitaldi guztietan parte hartu duena.
“Txikitatik izan dute Lopezek eta bere familiak Errepublikarekiko konpromisoa. Izan ere, bere aitak errepublikarrekin borrokatu zuen Gerra Zibilan eta errepresioa jasan zuten ondorengo urtetan”, adierazi du Pikoketak.
Jarraitu dutenez, Lopez 30 urterekin —orain 92 ditu— iritsi zen Errenteria-Oreretara, sei hilabetez lan egiteko. Egonaldi hura behin-betikoa bilakatu zen; alkate izatera ere iritsi zen urtebetez, 1998 eta 1999 artean. Hogei urtez izan zen udalbatzako kide.
Elkarteak herritar oro gonbidatu du ostiraleko ekitaldietan parte hartzera.
