Oiartzuarren ordezkaritza bat Galizian ibili da, Martinez Murgia omentzen
Kontxa Murgia oiartzuarraren semearen omenezko ekitaldietan parte hartu dute, bere heriotzaren mendeurrenean.
Poesia errezitaldian parte hartu zuten hainbat oiartzuarrek. Otsailaren 2an bete ziren ehun urte Manuel Martinez Murgia hil zela. Kontxa Murgia Egaña oiartzuarraren semea galiziar abertzaletasunaren bultzatzaileetako bat izan zen, eta, besteak beste, Academia Galegaren sortzaile izan zen. Rosalia de Castro idazlearen bikotekide izan zen.
Hori dela eta, ekitaldi sorta antolatu dute Galizian. Oiartzungo ordezkaritza bat izan zen bertan: poesia errezitaldian parte hartu zuten Xose Estevezek, Arantza Letek eta Antton Kazabonek, Anxo Angueirarekin batera. Haizea Lekuona eta Edurne Saizar oiartzuarrek musikatu zuten errezitaldia.
Udala ordezkatuz, Olga Leibar eta Iosune Cousillas zinegotziak joan ziren. Cousillasek oiartzuar guztien izenean eskerrak eman zizkien antolatzaileei omenaldian parte hartzeko gonbita egiteagatik.
Galizia eta Euskal Herriaren lotura “handia” dela esan zuen zinegotziak. “Gure kultura, hizkuntza, jatorria eta historia babestu eta hauspotzeko borrokak batzen gaitu”.
Kontxa Murgiaren jaiotetxea izan zenaren irudia agertzen den plana oparitu zien (gaur egun Manuel Lekuona biblioteka dena), bere semearen bizilekua izan zen etxean jartzeko (museoa da orain).
