Aurtengo edalontzia ere Juanfer Ricok diseinatu du
Hiru hamarkada eman ditu Sagardo Eguna berezko ezaugarriz jazten. Postuen zein Zumardiko agertokiaren dekorazioa, eta edalontziaren diseinua egin du urtero. Aurtengo omenduetako bat da Rico.
Ezustean harrapatu du omenaldiak Juanfer Rico. Hogeita hamar urte eman ditu Sagardo Egunaren antolaketan parte hartzen. Bere egitekoa, diseinuarekin lotuta egon da bide luze horretan bereziki,«postuak, eta Zumardiko agertokiaren dekorazioaz arduratu izan naiz, baita edalontzien irudiaren diseinuaz ere». Pandemia iritsi baino urte batzuk lehenago utzi zion antolaketan parte hartzeari, baina ez du erabat baztertu; aurtengo Sagardo Egunaren edalontziek bere diseinua izango dute grabatuta. «Ideiak agortuta nituen jada, 30 urte izan dira eta ez da erraza gauza berriak asmatzen jarraitzea. Oreretaren iraganari erreparatu nion, eta enpresa eta tailer mordoa zirela ohartuta, kalibrea irudikatzea otu zitzaidan», esan du omenduak. Kalibreak sagarra du helduta. «Kalibrea neurria hartzeko erabiltzen da, eta guk sagarrari kalibrea edo neurria hartua diogu».
Omenaldia, hunkigarria
Omenaldia «segada» gisa definitu du, hori bai, «segada ederra, atsegina eta hunkigarria». Alabak eta suhiak dantzatu zioten agurra, hunkitu egin zen. Emaztearentzat esker hitzak izan ditu Ricok, «Sagardo Eguneko bilerak eta lanketak egitera joaten nintzenean, Edurne [Dadebat] gelditzen zen alabarekin, eta orain 30 urte baditu ere, tartean txikia zen oraindik».
Diseinuarena bere zaletasun «frustratua» dela aitortu du. Sagardo Egunekoez gain, urtero mozorrotzen du Arkaitza taberna inauterietarako, eta berea izan zen madalenetan Herriko plazan Xanti eta Maialen dantzan jartzen dituen karrilloia egiteko ideia. Egun itxita dagoen Bitxikolore dendaren erakusleihoa txupetez betetzea ere hari otu zitzaion.
Idoia Arbelaitzekin batera sagarrondoa aldatu du Arramendin, «arbolaren kustodia partekatua dugu» esan du barrez, eta erantsi, pozgarria izan dela omenaldia Arbelaitzekin partekatzea, «ikaragarri langilea da eta estimu handia diot».
