Sagardoz zipriztindutako jai giroa nagusi izango da bihar
Sagardo Egunaren 35. ekitaldia egingo dute bihar, eta egun osoz zer gozatu izango da herriko kaleetan. Arratsaldez, 40 sagardotegitako uzta dastatzeko aukera izango dute Zumardira bertaratzen direnek.
Neketsua izan omen da bidea, traba ugariz josia, baina horiek denak gaindituta, bihar egingo dute Sagardo Eguna Errenteria-Oreretan. Hogeita hamabosgarren ekitaldia izango du udalerriko jai egutegian letra larriz idatzitako egunak. Erreferente bilakatu den eta arrasto itzela dakarren zalantzarik ez da.
12:00etan hasiko da Sagardo Eguna Foru Plazan egingo duten lehen txotxarekin. Hortik aurrera dultzaineroek, trikitilariek, txistulariek, dantzariek, txalapartariek eta bertsolariek girotuko dituzte bazterrak. Bigarren txotxa 18:00etan helduko da; Zumardian izango da hori, eta 40 sagardogileren uzta dastatzeko aukera izango da. Horretarako edalontzia erosi beharko da. Edalontzia, pintxoa eta sagardotegi batean bazkaltzeko zozketarako zenbakia 7 euroan lortu ahalko da, zapia gehituta, 10 euro dira. Hala ere, aurreko urteetako zapiren bat dutenei horiek baliatzeko gomendatu diete antolatzaileek.
omenduak
Urtero Sagardo Egunaren alde lan egiten duten pertsonak omentzen dituzte; aurten ere hala egingo dute. Juanfer Ricok eta Idoia Arbelaitzek egiten duten «ezinbesteko lanaren» aitortza jaso dute. Haiei zein antolaketan lanean gogor ari direnei aitortzarik onena eguna giro ezin hobean gozatzea izango da; eta sagardoa gutxi, eta maiz edatea.
