Bidegorri sare proiektu berriarekin "kea saltzen" ari direla salatu du Eguzkik
Irun eta Donostia bidegorri sare bidez lotzeko proiektuarekin kezkati agertu dira ekologistak. Planean "aktiboki" parte hartu duten arren, salatu dute ez dituztela aintzat hartu.
Gipuzkoako Foru Aldundiak Donostia eta Irun bidegorri sare baten bidez lotzeko aurkeztu berri duen proiektuarekin kezkati agertu da Eguzki talde ekologista. Albiste horrekin “kea saltzea” leporatu diote aldundiari eta aldundiak trazadura horri buruzko azterlan bat hasteko hartutako erabakia ere ez dute lorpentzat hartu ekologistek.
Jarduera horiek “atzerapausoak” direla erantsi dute. Gogorarazi dute ekologistek “aktiboki” lagundu zutela udal plana diseinatzeko lanetan (2016an onartu zuten bizikleta eta oinezkoen bideen plan hori), eta beraz, ez dute ulertzen haiek kontuan ez hartu izana. “Bizikletentzako soilik den bidegorri zatian egindako aldaketaz ari gara. Bidegorri horrek, ibaiaren ezkerreko ibaiertzetik eta Fanderiako kirol instalazioekiko paraleloan, Matxaingo zubia eta Zubia tabernaren parean Gabierrotarekin lotzen duen zurezko zubia lotzen ditu. Gure ustez, alderdi interesatuek zati horren erabilerari buruzko azterketa partekatu bat egin behar dute”.
Bestalde, salatu dute Nafarroa parkeko bukaeratik Lartzabal auzoaren hasierara arteko tarte horretan bidegorriaren trazadura kendu dutela, “interesatuak aintzat hartu gabe”. Autoak aparkatzeko prestatu dutela ere salatu dute. Mugikortasun iraunkorraren aldetik ez diote logikarik ikusten jardurea horri, “mugikortasun iraunkorrerako neurriak sustatzearen aurka baitoa”.
Azkenik, ibilgailu pribatuaren erabileraren joera aldatzeko eta joan-etorriak “modu jasangarriagoan sustatzeko” beharra nabarmendu dute.
