Mendi bizikletek Urkabe hartuko dute, OTXEk antolatutako proban
Oiartzungo BTT Sari Nagusia antolatu dute astebururako, cross country olinpiko modalitatean. Gipuzkoako Txapelketa izango da.
OTXEko kideek gaur aurkeztu dute proba. Oarsoaldeko Txirrindularitza Eskolak (OTXEk) Oiartzungo BTT Sari Nagusia antolatu du datorren astebururako. Cross country olinpikoko (XCO) modalitatean arituko dira larunbatean —hilaren 27a— eta igandean. Bigarren ekitaldia izango da.
Gaur aurkeztu dute proba. “Hemen bertan dagoen Urkabe mendia bere ingurune naturalarengatik eta mendiko bidezidor teknikoengatik da ezaguna. Ezaugarri horiek direla eta, leku hau agertoki ezin hobea da mendi bizikletako cross country lasterketa baterako”, adierazu du Arkaitz Iza OTXEko kideak.
Asteburu probarekin, helburu nagusia mendiko txirrindularitzarekiko “pasioa” eta bizimodu “aktibo eta osasungarria sustatzea” dela gaineratu du.
Gazteenetatik helduxeagoetaraino
Hainbat mailatako txirrindulariak bildu nahi dituzte Urkaben, giro “adiskidetsu” eta “desafiatzailean”.Euskal Koparako baliagarria izango den bi probetako bat izango da.
Larunbatean bi lasterketa egingo dituzte. 16:30ean hasiko da Kimu Mailakoena, eta 17:00etan, berriz, Haur Mailakoa. Bietan neska eta mutilak arituko dira.
Igandean, berriz, goizez lehiatuko dira. 10:00etan emakumeen lasterketa abiatuko da, bi minutura kadeteena eta lau minutura, Master 40 kategoriakoak. 11:30ean izango da sari banaketa.
12:00etan, Opena lehiatzen hasiko dira, Elite-23 urtez azpiko mailakoa, eta ondoren etorriko dira Master 30 mailakoarena eta juniorren lasterketa. Sariak 13:30ean banatuko dituzte.
Lasterketaren ordutegien, ibilbidearen eta aparkalekuen xehetasun guztiak —besteak beste— lasterketaren gida liburuan aurki daitezke.
Hurbiltzeko gonbita
Lasterketaz gain, “familia osoarentzako” janariarekin gozatzeko aukera egongo dela jkinarazi du OTXEk, parte-hartzaileekin batera “egun ahaztezina” pasatzeko.
Babesle eta laguntzaile guztiei eskerrak eman dizkie Izak. “Zuei esker, esperientzia paregabea eskaini diezaiekegu parte hartzen duten guztiei”. Boluntario zein antolakuntzako kideentzako ere esker oneko hitzak izan ditu.
Lasterketaren “emozioa” ingurune “ikusgarrian” bizitzera animatu dituzte, bai ikusle moduan baita txirrindulari moduan ere.
Espainiako Kopan, oso ongi
OTXEk gaurko agerraldia aprobetxatu du pasa den asteburuan Espainiako Kopan lotu diuzten emaitzen berri emateko. Balantzea positiboa izan da.
Kadete kategorian, Peio Munduate zazpigarren izan da, eta Intza del Teso hamargarren. Aimar Fernandez de Gorostiza 11. gelditu da.
Magali eta Gexan Albisu anai-arrebak zazpigarren eta bederatzigarren gelditu dira, junior eta elite mailan, hurrenez hurren. Izenez gaindi, talde osoaren “determinazioa” goraipatu nahi izan dute.
