[Bideoa eta argazkiak] "Gora Lezo!"
Alkate txikien pregoiarekin, Murixkaren dantzaldiarekin eta 'Lezoko herria' ereserkiarekin hasi dira 2023ko Santakrutz Festak.
«Gora Lezo!» esanez bukatu dute gaurko jaien hasierako pregoia Ixone Lorenzo Bergara eta Oihan Aldaba Diaz alkate txikiek. Haien ondoan zen Mikel Arruti alkatea, lehenengoz herri aurreko ekitaldi potolo batean: kontziente izan da gaurkoan hura ez zela protagonista, bai, ordea, alkate txikiak. Haiena izan da 2023ko Santakrutz Festak hasteko ardura, udaletxeko balkoi nagusitik. Suziria Lezoko zerura bota dute. Eta behean, herria, herritarrak: Murixka Dantza Taldekoek Agurra dantzatu dute, eta ondoren, ohorez, Tomas Garbizu Musika Eskolako kideek nahiz Munttar Txistulari Elkartekoek Lezoko herria ereserkia interpretatzeari ekin diote. Hasi dira 2023ko iraileko festak. Handi datoz. Azpialdeko irudi sortaren eta bideoaren bitartez ikus daiteke gaurko txupinazoaren benetako dimentsioa, hitzez bakarrik azal ezin daitekeena.
Hori bai, Ixone Lorenzo Bergarak eta Oihan Aldaba Diazek garbi adierazi dute euren hitzaldian jaiak bakoitzak bere erara, baina era egokian ospatu behar dituela, giro onean bizi behar direla, eta lagunen arteko harremana sendotzeko direla: “A! Eta ez ahaztu, urteko gainontzeko egunetan bezala, jai hauetan ere euskarari bere lekua emateko guztiok dugula ardura. Sinistu dezagun euskara ez dela daukagun zerbait, garen zerbait baizik!”. Ondoren bai, “gora Lezo!” esan dute agintari txikiek.
Egunaren hondarrean, festetako bigarren une indartsua: 22:45ean, herriko lau elkarteetako danborradak aterako dira euren egoitzetatik, hau da, Ixkulinen, Tiñeluren, Altzateren eta Allerruren egoitzetatik. Horiek 23:45ean elkartuko dira Gurutze Santuaren plazan, burrunba handi-handia egiteko. i-14 eguna han hasiko dute, herriaren erdialdean, plazan, lezoarrek. Ondoren, dantzarako tartea Laiotz taldearen erromeriarekin Karlos Saldise plazan (01:30).
Bihar, festetako egun handia: Santakrutz Eguna batzuentzat, i-14 Eguna besteentzat. Gozamena, berbera denentzat.
Santakrutzak, biharko egitaraua
Hilak 14, osteguna (bihar)
- 10:00. Diana Munttar Txistulari Taldearekin.
- 10:00-13:00. Gurpilen gaineko zirkuitua haurrentzat Saldise plazan.
- 11:00. Meza Nagusia Santo Kristo elizan.
- 12:00. Herri kirolak Gurutze Santuaren plazan. Aizkolariak: Iker Vicente, Eneko Saralegi, Julen Alberdi eta Ugaitz Mugerza. Harri jasotzailea: Mikel Mugerza.
- 12:00. Erraldoi eta buruhandiak.
- 12:30. ‘i-14’ eguneko topaketa Kale Nagusian, Txirbilla Sound Systemekin.
- 14:00. Erretiratuen bazkaria Etxeberri jatetxean.
- 14:30. ‘i-14’ egunaren txupinazoa Gurutze Santuaren plazan.
- 15:00. Arrantzaleen eta Tartekoen bazkaria Herri Eskolako jolastokian.
- 17:00. Haurrentzako puzgarriak Goiko plazan.
- 17:30. Josetxo Etxandi XLVII. Oroitaldiko federatuen finalak Koldobide Gezala pilotalekuan.
- 18:00. Erraldoi eta buruhandiak.
- 18:30. Herri Eskolako jolastokitik hasita, Jaixkipe txarangarekin kalejira.
- 20:30- Karlos Saldise plazan, DJ Bull.
- 22:00. Zezen suzkoa Gurutze Santuaren plazan.
