Zaurgarritasun egoeran dauden pertsona fisikoei edo bizikidetza unitateei laguntza gehigarri bat emango die udalak.
Udalak jakinarazi du zabalik dela Beraungo etxebizitza eraikinak birgaitzeko dirulaguntzak eskatzeko epea. Eraikinen jabeen erkidegoei emango dizkieten laguntzez gain, zaurgarritasun egoeran dauden pertsona fisikoei edo bizikidetza unitateei laguntza gehigarri bat emango die udalak.
Laguntzak jaso ahal izateko, programara atxiki beharko dute jabeen erkidegoek hilaren 29a baino lehen. Erregistro telematiko bidez egin beharko da hori.
Diru laguntza lerro hori Eusko Jaurlaritzako Lurralde Plangintza, Etxebizitza eta Garraio sailak Beraun auzoko hiri berroneratze integraleko prozesua gauzatu ahal izateko udalari eman dion dirulaguntzatik dator. Helburua, bizilagun komunitateei birgaitze sakoneko lanen ondoriozko kostuak ordaintzen laguntzea da. Hala nola, ikuskapen Teknikoaren Txostenak eskatzen eta gomendatzen dituen esku hartzeak etxebizitzetarako irisgarritasuna bermatzeko jarduketak: igogailuak instalatzea, arrapalak egitea, edo energia eskaera murriztea lortzeko jarduketa ere lagunduko dira.
Laguntza jasoko duten blokeak deialdiko irizpideen arabera hautatuko dira, hautagaitzak aurkezten dituztenen artean. Bloke horietako jarduketetara 1.160.382,01 euro bideratuko dira.
Eskaerak hilaren 29ra arte
Laguntzak jaso ahal izateko baldintzak betetzen dituzten jabekideen erkidegoek Errenteriako Udalari adierazi beharko diote programari atxikitzeko borondatea, hilaren 29ra arte.
Hurbiltasun bulegoa auzoan izango da zerbitzua ematen, zalantzak argitu, eta birgaitze planak eta proiektuak egiteko beharrezko urratsak egiten laguntzeko. Aurrerantzean ere zerbitzua eskainiko du, baina ez da presentziala izango. Bizilagunek 673 41 64 76 telefono zenbakira deitu ahalko dute 09:00etatik 14:00etara, edo posta elektronikora mezua bidali. Horretarako egin klik hemen. Dirulaguntzaren oinarriak eta beharrezko dokumentazioa eskuragarri dago hemen klik eginda.
