Doinu kubatarrekin hasi da Garagardo Festa
Orlis Pineda 'kañautorea' izan zen Lezoko Garagardo Festaren lehen egunari ginga jartzeko arduraduna. Gaur eta bihar, gehiago.
Orlis Pineda kantautorea, atzoko emanaldian.
Atzo arratsaldean hasi zen Lezoko Garagardo Festa. Eguraldia lagun, bertan dauden hemezortzi garagardo klaseak dastatzeko giro ederra izan zen. Festan lan egiteko prest azaldu diren 130 boluntarioetatik lehenak (aurre-lanean ere izan dira lezoar asko) hasi ziren txorrotei eragiten.
Baina garagardoaz eta jakiez gain, atzokoan bazen ekitaldi berezi bat: Vallecasen bizi den Orlis Pineda kantautore kubatarrak kontzertua eman zuen gaua sartua zenean. Tiñelu elkarteko antolatzaileak pozik mintzo dira abeslariaren saioaz: “Orlis Pineda kañautorearen bi orduko kontzertua ikusleak ase zituen. Melodiengatik, eta horien letrengatik”.
Gaur da Lezoko Garagardo Festaren bigarren eguna. 18:00etan zabaldiko dute Karlos Saldise plazako gunea (biharko azken egunean ere hala izango da. Hala, gaurko 23:00etatik aurrera Jaixkipe txarangaren doinu biziek girotuko dute plaza; bihar, berriz, 22:15ean Traband taldeak kontzertua emango du, eta gauerdian hasiko dira Xala eta Garazi Saldise astintzen.
