[Argazkiak] Hasi da Kilometroak Errenteria-Oreretan
Jarduerak 11:00etan hasi badira ere, herriko txokoak 10:00etarako betetzen hasiak ziren.
Igandetako goiztiarrek ez dute huts egin Kilometroak 23 Gipuzkoako ikastolak sustengatzeko aurtengo hitzorduari. Haiek izan dira herrira iristen lehenak, 10:00ak aldera eta, azkarrak izan dira, bai, ilararik ez baitute egin behar izan tiketak diruagatik trukatzeko. Ordu horretan, gainera, irekiera ekitaldia egin dute Lekuonako zubian eta ibaiertza betetzeko ere hantxe izan dira guraso, ikasle, ordezkari politiko eta herritarrak.
Euskotrenen geltokitik ari da jende andana etortzen. “Hara! Akrobaziak! Joango gara? Eta… gero Goazen!” osatu dute neska gazte batzuek haien plana. Semearekin zihoan aita batekin ere egin du topo HITZAk eta Willis Drummonden kontzertura joatea zuten asmo.
Iztieta pasealekuan haurrak ziren nagusi. Eguzkipean itxaroten ikusi dira familiak bertako haur jolasetan jostatzeko. Paseoaren amaieran, Goazenen karaokea prest dago, zintzurrak bertan geratuko direnaren itxaropenez. Egitarau osoa, lotura honetan.
