[Argazkiak] Bazkaltzeko ere ez dira gelditu
Bazkalordua geroratzea erabaki du batek baino gehiagok, sabeleko hutsunea ez sentitzeko adina eskaintza baitzegoen eguerdian herrian.
Bazkaltzeko kuadrillen korroetan bokatak nagusitu dira. 
Bazkalorduan arimarik ez zen kabitzen Linon. Gozategiren kontzertua 13:15ean hasi eta ia 14:30a pasatxo arte luzatu da, bertaratu diren ehunka lagunek behin eta berriro eskatu baitiote “beste bat” taldeari.
Oholtzaren ingurua festaren epizentro izan bada ere, periferian ere zailtasunak topatuko zituen nork edo nork, presaka baldin bazebilen, bereziki, gune batetik bestera joateko. Izan ere, goiz-goizetik kaleak hartu dituzten ibiltariez gain, korroan eseritako taldeak ere sortu baitira bazkalorduan. Bokatak nagusi, kuadrilla desberdinen hautuen artean.
Lagun taldeen nahiz familien topaleku bihurtu dira itzalgune eta iturriak. Sargori esnatu da eguna, eta horri aurre egin behar. Mahai-tresna eta guzti bazkaltzera eseri direnak Foru plazako gazteak izan dira. Goizean zehar Erronkan parte hartu duten hainbat ikastoletako ikasleak plazan elkartu dira bazkaltzera, beraiek kozinatutako pastaz gozatzeko, gainera. Hori zen Erronkaren probetako bat.
Ikusi arestian kontatutako guztia ondoko irudietan.
