[Argazkiak] Ikasturte berria kalean hasi dute pentsiodunek, borrokan
Manifestazio jendetsua egin dute gaur goizean herriko kaleetan barrena, Duintasuna elkarteak deituta, "gure eskubideak adinarekin iraungitzen ez direla aldarrikatzeko".
Gaurko manifestazioan ateratako irudi bat. Udako etenaldiaren ondoren, indartsu itzuli dira eskualdeko pentsiodunak. Ikasturte berriari ekin diote gaur, nola ez, borrokan. Manifestazio jendetsua egin dute gaur goizean herriko kaleetan barrena, Duintasuna elkarteak deituta, “gure eskubideak adinarekin iraungitzen ez direla aldarrikatzeko”. Atzo, gainera, Adinekoen Nazioarteko Eguna izan zen, eta ospakizunetatik harago, egunak duen kutsu aldarrikatzaileari eutsi nahi izan diotela esan dute gaurko mobilizazioan.
Adinekoek bizi baldintza “duinak” izateko eskubidea dutela esan dute manifestazioa abiatu aurretik, “pentsio publiko duin eta nahikoak” behar dituztela, baita “zerbitzu publiko unibertsalak eta gure arreta beharrak aseko dituen zainketa sistema publikoa”. Oraindik ere eskubide horiek bermatu gabe daudela salatu dute: “EAEn eta Nafarroan 200.000 pentsiodun baino gehiago 1.080 euro baino gutxiagoko pentsioekin bizi dira, eta horrek ez die oinarrizko beharrei aurre egiten uzten”, esan dute.
Azken urteetan egoitza zerbitzuak eta arreta zein zainketa zerbitzuak garestitu egin direla erantsi dute, “gobernu desberdinen irrika pribatizatzaile eta ekonomizistak” bultzatuta, eta horrek “oinarrizko negozio eta irabazi eredu bat” ekarri duela. Ondorioz, zerbitzua garestitzeaz gainera, lan baldintzak okertu direla diote, baita prestazioen kalitatea ere. “Bitartean aldundiek eta gobernuek autokonplazentziazko diskurtsoak egiten jarraitzen dute arazoak ezkutatzeko”.
Horregatik guztiagatik, honako bost eskaerak egin dituzte gaurko mobilizazioan:
- EAEko eta Nafarroako gobernuei mendekotasuna artatzeko sistema publiko hurbil eta kalitatezkoa garatzea.
- EAEren kasuan, egoitzei buruzko dekretuaren zirriborroa aldatzea, elkarrizketaren eta gizarte eragileen parte hartzearen bidez.
- Gutxieneko pentsioa 1.080 eurora berehala osatzea.
- Gure aldarrikapenak babestea, galdutako erosteko ahalmena berreskuratzeko, genero arrakala ezabatzea eta murrizketen erreformak eta erretiro aurreratuaren koefiziente murriztaileak indargabetzea.
- Urriaren 2an, astelehena, Bilbon, Donostian, Gasteizen , Iruñean eta ohiko herrietan mobilizatuko gara.
