Yon Oñatibia etorbidearen itxuraldaketa, bukatuta
Done Eztebe eta Landetxe plazak lotzen dituen kalea hobetu, oinezkoen segurtasuna handitu eta "atseginago" eta "irisgarriago" egin dute.
Garazi Urdanpilleta alkateordea eta Agustin Lekuona Hirigintza zinegotzia. Yon Oñatibia kalea berritzeko lanak bukatu ditu Oiartzungo Udalak. Done Eztebe eta Landetxe plazak lotzen dituen kalea itxuraldatuta dago.
Udalaren helburua izan da kalea “hobetzea”, oinezkoentzako seguruago izatea, baita —oro har— “atseginagoa” eta “irisgarriagoa” izatea.
Udalak jakinarazi duenez, oinezkoek izango dute bertan lehentasuna. “Landetxeko eraikina eta plaza berria egin ondoren, udalerriko bi plaza nagusien arteko lotura indartu eta joan-etorriak sustatu nahi ditugu”, adierazi du Oiartzungo Udalak.
Oiartzungo erdigunea herritarrentzako “berreskuratu” nahi izan dute, espazio “zabal, lasai eta bizia” izan dadin.
Errepide zenaz gain, lorategia ere berritu dute. Eserleku gehiago jarri, irisgarritasuna erraztu eta paretak txukundu dituzte, baita barandak jarri ere.
Ibilgailuei itxita
Xorrolaren autobus markesina Yon Oñatibia kalearen hasieran jarri dute. Horrez gain, taxi geltokia kale horretara mugituko dute. Modu horretan, Done Eztebe plazan auto gutxiago ibiltzea izango da helburua.
Yon Oñatibia kalea, beraz, oinezko eta txirrindularientzako bakarrik izango da. Xorrola, taxiak zein baimendutako ibilgailuak bakarrik pasatu ahal izango dira bertatik. Horien abiadura moteltzeko galtzada berezia jarri dute bertan.
Oiartzungo Udalak iragarri duenez, gainontzeko ibilgailuek obrak iraun arteko bidea hartu beharko dute: ondoko Rafael Pikabea hartu beharko dute.
270.900 euroko aurrekontua izan du proiektuak. Arauak errespetatzeko eskatu du Udalak eta ibilgailuekin bertatik ez pasatzeko, Oiartzungo erdigunea herritarren “elkargunerako espazio atsegina” izan dadin.
