Zintzilikek 39. denboraldiari ekingo dio
Errenteria-Oreretako irrati libreak deialdia luzatu du, barne funtzionamendua edo podcast zein irratsaioa egin nahi duen oro haiekin harremanetan jar dadin.
Zintzilik Errenteria-Oreretako irrati libreak 39. denboraldiari ekingo dio aurten. Buru belarri dabiltza aurtengo ikasturteko eskaintza prestatzen. Hori dela eta, deialdia luzatu dute, irratiaren barne funtzionamendua ezagutu zein irratsaio edo podcasta egin nahi duten herritarrak Zintzilikeko kideekin harremanetan jar daitezen. Kezkak eta irratiaren filosofia ezagutzeko aukera badela ere azaldu dute.
Oroitarazi dute Zintzilik irratia “autogestio eta asanbladetan” oinarritzen dela, eta eduki “kritiko eta ez-komertzialak” lantzen dituztela. Hori dela eta, irizpide horien baitan modu batean edo bestean lagundu nahi duten banako eta kolektiboek urriaren 28ra, larunbatera, arte izango dute mezua bidaltzeko aukera. Helbide elektroniko hau jarri dute eskura, eta sare sozialen bidez ere haiekin harremanetan jartzeko aukera luzatu dute.
