Gazteentzako topalekua irekiko dute Landetxen, hilaren 26an
12 eta 17 urte arteko oiartzuarrentzako txokoa irekiko dute Landetxen. Ostegun, ostiral eta larunbat arratsaldeetan egongo da irekita.
Ekain Susperregi Gazteria zinegotzia Udane Altuna eta Leire Agudo topalekuko hezitzaileekin. Datorren ostegunean, hilak 26, herrik gazteentzako topalekua irekiko du Oiartzungo Udalak. 12 eta 17 urte bitarteko nerabeek aisialdiarekin “gozatzeko” gunea izango dela nabarmendu dute.
Landetxe plazan egongo da, eta bertan “balioak” eta “parte-hartze aktiboa” sustatuko dituztela jakinarazi dute.
“Gazteei zuzendutako aisialdirako erreferentziazko espazio izango da, haien nortasuna eta autonomia garatzeko lekua”, zehaztu du udalak.
Ostegun, ostiral eta larunbat arratsaldero egongo da irekita, 17:00etatik 21:00etara. Ostiraletan 21:30era arte luzatuko da.
Ezaugarri positibodun aisialdia
Gazte topaleku berriak izango dituen ezaugarri eta helburuak zerrendatu dituzte: “Bakarrik edo kuadrillan ongi pasatzeko, lasai egoteko, jende berria ezagutzeko, besteekin batera bizipenak partekatzeko, Landetxen bertan edo kalean haien intereseko ekintzak egiteko, zaletasun berriak praktikatzeko, elkarrizketarako, sorkuntzarako, hausnarketarako, kezkak elkarbanatzeko, egun-pasa edo asteburu-pasak prestatzeko…”.
Azken finean, denbora libreaz gozatzeko lekua izango dela nabarmendu du Oiartzungo Udalak, antolatutako zein antolatu gabeko jardueren “eskaintza zabala” izango duena.
Bi hezitzaile eta koordinatzaile bat izango ditu topalekuak. Ardatz izango diren balioen berri eman dute: inklusioa, hezkidetza, genero-berdintasuna eta euskara.
“Oiartzungo nerabeen beharrei erantzutea da egitasmoaren helburu nagusia”, adierazi dute udaleko iturriek. “Hezitzaileak bidelagun dituztela, dituzten nahiak, kezkak, beharrak eta interesak landu eta nerabe izatetik gazte izaterako trantsizioan funtsezkoak diren gaitasunak, balioak, bizitzarako trebeziak eta baliabide pertsonalak indartzeko”.
Programa, gazteek osatua
Tailerrak egiteko gela, ping-pongeko mahaia, wifia, mahai-jokoak eta pufetan lasai egoteko txokoa izango ditu topalekuak, besteak beste.
Iragarri dutenez, hilaren 26tik aurrera, nerabeekin joango dira espazioari eman nahi dioten erabilera zehazten eta bertan izan nahi dituzten txokoak eta baliabideak sortzen.
Erabiltzaile izango diren gazteek “modu aktiboan” parte hartuko dutela adierazi dute. Hezitzaileekin batera elkarlanean osatuko dute programazioa. “Beren gustuak, nahiak era iritziak izango dira abiapuntua eta denbora librea beren kabuz kudeatzeko tresnak eta aukerak eskainiko dizkiete”, esan dute.
Nerabe guztiei zabalik
Jarduera edo irteera batzuetarako izan ezik, topalekura joateko ez da aurrez izenik eman beharko. DBHn dauden oiartzuar denentzat egongo da irekita.
Zerbitzu honekin 0-17 urte bitarteko haur eta gaztetxoentzako eskaintza osatu nahi izan du udalak, aisialdiaren bitartez bide-laguntza eman eta adin batetik besterako aldaketetarako eta bizitzarako tresnak lantzeko.
0-12 adin tarterako familien txokoa eta ludotekaz gain, 12 eta 14 urte dituztenentzat Kuadrillategi egitasmo arrakastatsua martxan du. Topalekuarekin DBH 1 eta 2. mailetako nerabeen aisialdi hezitzailerako aukera indartu eta 17 urte bitartekoentzat zabalduko du.
