«Ohiz kanpokoa eta arraroa» zer den hausnartzeko obra
Gaur abiatuko dira Pasaiako Umorezko Antzerki Jardunaldiak. Ezezagunok konpainiaren ‘Exacticamente Diversa’ obrak irekiko du festibala. Adimen desgaitasunari buruz hausnartzeko gonbidapena.
Ezezagunok konpainiaren ‘Exacticamente Diversa’ antzezlaneko promozio irudia. 
Umorez gainezka egingo du herriak gaurtik datorren asteko igandera bitarte (hilak 29), bi asteburuz. Pasaiako Umorezko Antzerki Jardunaldien (PUAJ) 2023ko ekitaldiak gaur bertan hartuko du lur Pasaian, Ezezagunok konpainiaren Exacticamente Diversa antzezlanarekin. Donibaneko Juanba Berasategin eskainiko dute obra, 19:00etan.
Jardunaldien bigarren geltokia Antxo izango da, bihar arratsaldean. Kasu horretan, kaleko antzerki emanaldia eskainiko du Cia Barsanti taldeak, Legea gu gara izenpean. 19:00etan hasiko da baita hori ere. Sinopsiaren hasierak hala dio: «Publikoak, plazara gerturatzean, erdi-erdian furgoneta susmagarria aurkituko du. Sergio eta Erramun plazara iritsiko dira bertan ospatuko den legez kanpoko botilzarra ekiditeko». Antzezlan horretaz gozatzeko ez da gonbidapenik behar.
Asteburuko azkena Tentazioa antzerki taldeak ekarriko du herrira. Nunca he estado en Dublín lana Juanba Berasategin emango dute, aurreko bien ordu berean. Horretarako, ordea, aurrez erosi beharko dira sarrerak bibe.me plataformaren bitartez (11,11 euroan).
Epai, aurreiritzi eta onarpenari buruzko hausnarketa oholtzaratuko dute antzezleek. Hala laburbildu dute sinopsian: «Amesti familia Eguberri gaua ospatzeko bildu da, baina aurtengoa berezia da. Hiru urtez ikusi ez duten alaba gaztea, Elena, Londrestik itzuli da. Ez dator bakarrik, Cyndirekin dator, bere neska-lagun irlandarrarekin. Inork ez du espero ordea, Cindy pertsonaia ikusezina izatea».
‘Ezezagunok’ gertutik ezagutzeko
Arestian aipatu bezala, Ezezagunok konpainiaren azken lanak inauguratuko du aurten PUAJ. Irabazi asmorik gabeko anzerki elkarte hori 2008an jaio zen. Ordutik, antzerti-formakuntza eskaini eta antzezlanen sorrera nahiz horien zabalkundean dihardute.
Askotarikoak dira aktoreak, baina ezaugarri batek egiten ditu kolektibo horretako kide: adimen desgaitasuna dute. Ezezagunok elkartearen asmoa kideen parte hartzea bultzatzea da, antzerkiaren bidez eskuraturiko erremintak egunerokoan ere baliagarri izan ditzaten.
Gaurkorako sarrerak Bibe atariaren bidez eros daitezke, 5,56 euroan. Sinopsia eta lanaren laburpen bideoa ere bertan ikus daitezke.
