Palestinan "sarraskia erabat gelditzea" eskatu dute
Elkarretaratzea egin dute gaur arratsaldean Oiartzungo plazan, Israelen esku-hartze militarra salatu eta palestinarri elkartasuna adierazteko.
Palestinaren aldeko elkarretaratzea egin dute plazan. Hamarnaka lagun batu dira gaur arratsean, Oiartzungo plazan, Palestinari elkartasuna adierazteko.
Salatu dutenez, urriaren 7tik areagotzen ari da Israel eta Palestinaren arteko gatazkaren indarkeria. “Palestinatik iristen zaizkigun berriak kezkagarriak dira, oso”, esan dute.
Gazaren gaineko bonbardaketek ehunka hildako eta milaka zauritu eragiten ari direla salatu dute. “Horietako asko umeak dira”, zehaztu dute.
Bonbardaketa zuzenez gain, beste eraso batzuk zerrendatu dituzte: “Argindarraren, uraren eta bestelako oinarrizko hornigaien mozketa; Gaza Hiriko biztanleei euren etxeetatik alde egiteko eman zaien ultimatuma…”. “Larrialdi humanitario” baten aurrean daudela adierazi dute.
Gogorarazi dutenez, 1948tik aurrera Israelek Palestinako lurren “okupazioan” jardun duela esan dute. “Hilketak, atxiloketa arbitrarioak, mugimenduen mugatzea, beren lur eta etxeetatik kanporaketak, bi milioi pertsona Gazan giltzapetuta… Giza eskubideen urraketak ematen ari dira etengabeeta azken asteetan 75 urte horietako egoera lazgarriena bizitzen ari dira”.
Elkartasuna eta babesa
Aipatutako guztiagatik, Palestinako herriari “elkartasun eta babes osoa” adierazi diete. “Sarraskia erabat geratzea” eskatu dute, baita “okupazioaren bukaera” eta Palestinaren autodeterminazio eskubidea bermatzea ere. “Palestinarrak bakean eta askatasunean bizi daitezen”, zehaztu dute.
“Norabide horretan mobilizatzea eta presio egitea da Palestinari eta haren askatasunari egin dakiokeen ekarpenik handiena”, jarraitu dute. Ildo horretan, bihar Donostian egingo duten manifestaziora joateko gonbita egin diete oiartzuarrei. Antiguako tuneletatik aterako da, 17:30ean.
