Euskararen erabileraren kontrako epaiak, plenoan hizpide
Datorren asteartean egingo dute urriari dagokion plenoa, asteazkenean greba eguna baita. Zortzi puntukoa izango da.
Pasa den iraileko plenoko irudia. Oiartzungo udalbatza datorren asteartean elkartuko da, urriari dagokion ohiko plenoa egiteko. Eguna ezohikoa izango da, asteazkenean greba deitu dutelako administrazioan.
EH Bildu eta EAJ udal taldeek adostu dute eguna aurreratzea. Ordutegia ere aurreratuko dute; 16:00etan izango da. Izan ere, 17:00etarako hitzaldi bat antolatuta dago, eta hori errespetatu nahi dute.
Nola eragin zure seme-alaben hizkuntza ohituretan? da hitzaldia, Ttur-ttur Euskaltzaleon Bilguneak eta UEMAk antolatutakoa.
Edukiari dagokionez, zortzi gai landuko dituzte. Horietako bat izango da Araba, Bizkai eta Gipuzkoako Auzitegi Nagusiak euskararen erabilera arautzeko lege-artikuluen kontrako ebazpenak hizpide dituen adierazpen instituzionala.
Adierazpen instituzional horren zirriborroa irakur daiteke estekan klik eginda.
Gai-zerrenda
- Aurreko batzarrari dagokion aktaren onarpena.
- EAEko Justizia Auzitegi Nagusiak Eusko Jaurlaritzaren 179/2019 Dekretuaren hainbat artikulu baliogabetzeko emandako epaiari buruzko adierazpen instituzionala.
- Udal Ikastola Partzuergoaren estatutuen aldaketa.
- Elorrondo 10ean igogailua ezarrita zoru publikoaren okupazioa onartzea.
- Beste ekitaldietako ordainagiriak baliogabetzea, zuzentzea edo berrikustea.
- 22/23 ikasturteko E1 Eskola Kirola, Eskola pilota, Muittu! eta eskola ordugaineko ekintzen koordinazio egitasmoak sustatzeko Oiartzungo ikastetxeekin sinatutako hitzarmenetatik eratorritako dirulaguntzaren bigarren zatiaren ordainketa onartzea.
- Beste organoen jardueraren jarraipena.
- Eskari-galderak.
