Euskararen aldeko manifestaziora joateko autobuserako zerrenda, prest
Azaroaren 4an izango da manifestazioa, Bilbon. Herriko ikastetxeetan zein beste txoko batzuetan eman daiteke izena.
![euskararen kontrako oldarraldia](https://oarsoaldea.hitza.eus/site/files/2023/10/euskararen-kontrako-oldarraldia.jpg)
Euskalgintzako eragileek manifestazioa antolatu dute azaroaren 4rako. Oldarraldiaren aurrean, euskararekin bat, euskaraz bat leloa izango du, eta euskararen erabilera mugatzen duten ebazpen judizialak salatuko ditu.
Bilbon izango da manifestazioa, 17:00etan, Euskalduna jauregitik abiatuta. Bertara joateko Oiartzundik autobusa aterako dela jakinarazi dute. Manifestazioa hasi baino bi ordu lehenago —15:00etan— aterako da, Haurtzaro Ikastolako aparkalekutik.
Autobusean izena emateko zerrenda atera dute. Herriko hainbat txokotan aurki daitekeela adierazi dute mobilizazioaren harira sortutako lan taldeko kideek. Honakoa tokietan eman daiteke izena:
- Elizalde Herri Eskolan.
- Haurtzaro Ikastolan.
- Intxixu-AEK euskaltegian.
- Kastro tabernan.
Prezioen berri ere eman dute. Pentsiodun, langabeek eta adin txikikoek 7 euro ordaindu beharko dute, eta gainontzekoek, 10.
Pasa den ostiralean, manifestazioari atxikimendua adierazteko argazki jendetsua atera zuten hamarnaka oiartzuarrek.