Hilerri inguruko trafikoan aldaketak izango dira, igandetik aurrera
Hainbat aldaketa egongo dira trafikoan, eta aparkatzeko behin-behineko tokiak ezarriko dituzte, Domusantu egunaren harira.
Datorren asteazkena azaroaren 1a da, Domusantu Eguna. Hilerrira bisitak ugaritu egiten dira egun horretan, baina baita aurrekoetan ere.
Horregatik, trafiko aldaketak izango direla iragarri du Oiartzungo Udalak. “Segurtasuna hobetu” eta “aparkatzeko toki gehiago izateko” trafiko aldaketak egingo dira hilaren 29tik (igandea) azaroaren 1eko gauera bitarte.
Modu horretan, Sibeluts-Goizueta kaleko bidegurutzetik kanposantura ezingo da kotxearekin pasa. Irteerarako bakarrik izango da noranzko hori, autoak aparkatzeko erabiliko baita goranzko erraia.
Hilerriraino autoarekin joateko Sibeluts 1etik (Haurtzaro Ikastolatik) joan beharko da.
