Azaroaren 4ko manifestazioarekin bat egin dute Oiartzungo zinegotziek
Udal Legearen barruko artikuluen kontrako azkeneko epaiak salatu dituzte Oiartzungo zinegotziek, adierazpen instituzional batekin.
Bi udal taldeetako zinegotziek babesa adierazi zioten deialdiari. Oiartzungo EH Bilduko eta EAJko udal taldeek adierazpen instituzionala adostu dute. Udal Legean euskararen erabilera arautzen duten artikuluen kontrako epaiak izan dituzte hizpide testu bateratu horretan.
Sei puntuko adierazpena da, eta bertan beraien “kezka” eta “larritasuna” islatu dute. “Euskararen indarberritze-prozesuaren kontrako” epaiak direla esan dute. “Euskararen biziberritzearen aurkakoak ez ezik, adostasun sozial handi baten kontrakoak ere badira”, gaineratu dute.
Epaitegiek baliogabetutako artikuluak jasotzen dituen Udal Legea Eusko Legebiltzarrean “kontsentsu zabalarekin” onartu zutela nabarmendu dute.
Gizartearen euskararekiko atxikimendua ere izan dute hizpide bi udal taldeek: “Azken inkesta soziolinguistikoek ere argi erakutsi baitute gizartearen gehiengo zabalak babesten dituela euskararen normalizazioa helburu duten politikak”.
Sententziak udalerri euskaldunei “bereziki” eragiten diela adierazi dute, “horietan ari baitira artzen euskaraz funtzionatzeko neurri gehien”.
Epaiak UEMAko udalei “bete-betean” eragiten diela nabarmendu dute, hizkuntza-plangintzari eta kontratazioari, adibidez. “Oiartzungo Udalak helburu nagusien artean du herrian euskara normalizatzea eta herritar guztien hizkuntz-eskubideak bermatzea, eta sententzia honek oztopoa besterik ez dakar”.
“Oraindik bada zer egin”
Bi udal taldeek esan dutenez, Oiartzun bezalako udalerri euskaldunetan aurrerapen handiak egin diren arren, “oraindik bada zertan eragin”.
Udalaren barruan ere euskarak “urrats handiak” egin dituela azaldu dute. “Gaur egun”, jarraitu dute, “zerbitzu-hizkuntza nagusia ez ezik, lan-hizkuntza nagusia ere bada”. Bide horretan jarraituko dutela iragarri dute: “Euskara da gure udalerriko hizkuntza propioa eta hori sustatzen jarraitzeko konpromisoa dugu”.
Horretarako “lege-orube sendoa” behar dela uste dute Oiartzungo EH Bilduk eta EAJk. Legeak egiteko eskumenak dituzten gainontzeko erakundeei dei egin diete, “beren eskumenekin eta elkarlana oinarritzat hartuta”, euskararen “indarberritzea” lege-babes “sendoekin” hornitzeko.
Euskalgintzaren Kontseiluak azaroaren 4an Bilbon antolatutako manifestazioarekin bat egin dute zinegotziek eta herritarrei ere dei egin diete mobilizazioan parte hartzeko.
