Pontikako aparkalekua udaberrirako izango da erabilgarri
Pontikan eraikitzen ari diren aparkalekura bisita egin dute gaur udal ordezkariek.
Pontikako aparkaleku berria izango denera bisita egin dute gaur. Pontikan eraikitzen ari diren aparkalekura bisita egin dute gaur udal ordezkariek. Lanen jarraipena egin dute bertatik bertara Aizpea Otaegi alkateak eta Eneko del Amo Hirigintza zinegotziak udaleko zein eraikitze lanetan ari den enpresako hainbat kiderekin batera.
Otaegik eman du lanen garapenaren gaineko berri, eta nabarmendu du asko kostatu dela oinarria jartzea: “Azkenean lur asko atera behar izan delako eta azkenean, euste-horma eraikitzeak lan handia eman duelako. Oinarria jartzea asko kosta da, hilabetetako lana izan da, esan modan, baina dagoeneko hasi gara egitura bera altxatzen, eta ikus daiteke aparkalekuaren egitura zein izango den”.
Pontikako aparkaleku berria, hiru solairukoa izango da, eta 183 aparkamendu plaza izango ditu, eta kontzesioa, alokairua, eta errotaziozko aukerak emango ditu, “sekulako zerbitzua emango dio eremu guzti honi eta batez ere deskargatuko du gaur egun, etorkizuneko Barandiaran parkea izango den horretan, aparkatzen diren autoak hona ekartzeko aukera emango duelako. Horrek bermatzen duena da, hau egiten dugun neurrian, Barandiaran parkea hurbilago dagoela eta eraikitzeko baldintzak sortzen ari garela”.
Egitura muntatzen ari dira, urtarril amaiera edo otsail hasierarako lanak amaituta izango dituztela aurreikusi du alkateak, eta antolaketarako pare bat hilabete gehiago emanda, udaberrirako erabilgarri izango da aparkaleku berria.
Pontikako aparkaleku berria izango denera bisita egin dute gaur.
Eraikuntza modua bera berezia da udalak azaldu duenez. Behin egitura eginda, solairuak aurrez fabrikatutako piezekin eraikitzen ari dira, “horrela eraikina desmuntagarria eta berrerabilgarria izango da”. Proiektua egiteko 3.248.422 euroko inbertsioa egin du udalak.
Etorkizuneko Barandiaran parkeari erreferentzia, berriro, alkateak: “Urteetako parkearen eskaerari erantzuteko oso oinarri sendoa jartzen dugula aparkalekua hau eraikita sinistuta gaude; berri ona da”.
Azken urtean Barandiaran parkea definitzeko prozesua egin da. Halaber, lurzoruaren kalitatearen azterketa osatzeko eta gaur egungo egoera ezagutzeko beharrezko zundaketak egin dituzte, baita garbiketa lanak hasi ere.
Beraun kalean bertan, irailean bukatu zituen aparkaleku publiko berria egi bihurtzeko lanak udalak. 63 aparkaleku plaza berri sortu zituen bertan. Aurretik, aparkaleku gisa erabiltzen ziren hainbat espazio urbanizatuko ditu udalak , zehazki, Beraun kaleko 5 eta 15 atari arteko etxe aurrealdeetan egingo ditu lanak, plaza bihurtzeko. Plazak urbanizatzeko lizitazio prozesua martxan du udalak, eta horren bidez 1.700 metro koadro inguru irabaziko dira pertsonentzako, gune berdeak, haur jolasak eta egonlekuak ere izango dira sortuko diren espazio berri horietan. “Eraldaketa hori, etxe horietan bizi diren bizilagunentzako sekulako aldaketa izango da, eta bizi kalitatean eragin handia izango duen interbentzio izango da. Beraun kaleko aparkaleku publiko horrekin bermatzen dugu bertan lehen aparkatzen zuten autoek lekua izango dutela, eta aparkaleku plaza gehiago daudela gainera. Osotasunean mesede egingo die bertan bizi direnei, baita bertan autoa aparkatzen dutenei ere”.
Horiek plaza bihurtuta ere, Beraungo kalean zabaldutako aparkaleku publikoarekin aparkaleku plaza gehiago izango dira, eta datorren udaberritik aurrera Pontikako aparkaleku eraikin berria ere izango da erabilgarri: “Bi aparkalekuak eraikitzeak zonalde guzti honi ematen dio gaur egun ez duen erantzun bat aparkalekuaren arazoari”.
