[Bideoa eta argazkiak] Oiartzuarrek Gau Beltzaz gozatu dute
Jende mordoa bildu zen atzo urteko gau beltzenaz gozatzeko. Txarako parketik abiatu zuten beldurrezko ibilbidea, eta Done Eztebe plazan bukatu zuten suzko akerra errez. Gau Beltza Asteak jarraipena izango du bihartik aurrera.
Jende mordoa bildu zen atzo Oiartzunen Gau Beltzaz gozatzeko. Abaraxka Udal Ludotekak eta Oiartzungo Antzerkizaleen Elkarteak deituta, Txarako parkean bildu ziren bertaratutakoak. Afari merienda autogestionatua egin ondoren, Olarri Dantza Taldeak dantza emanaldia eskaini zuen, eta Txaratik ekin zioten beldurrezko ibilbidea osatzeari.
Botanikotik hilerrira abiatu ziren, eta bertan ekitaldia egin eta bertsoak abestu zituzten. Bertatik Ibargain parkera jo zuten, eta han dantza emanaldiak egin zituzten. Azkenik, ohi bezala, beldurrezko ibilbidea Done Eztebe plazan bukatu zen, suzko akerra errez (ikus bideoa).
Gau Beltzaren argazkiak antolakuntzarenak eta Eneko Salaberriarenak dira. Hona hemen:
Heriotza ardatz
Oiartzuarrek Gau Beltzaz atzo gozatu bazuten ere, egun horren baitan antolatutako jarduerek ez dute etenik izango, aurtengo Gau Beltza Gau Beltza Astea izatera pasatu baita.
Abaraxka Udal Ludotekak eta Oiartzungo Antzerkizaleen Elkarteak, Zaintzadirekin elkarlanean, hitzaldi bat antolatu dute biharko (osteguna, hilak 2) udaletxeko pleno aretoan, 17:00etatik 19:00etara. Heriotza ere bizitza da hitzaldi tailerra emango du Aingeru Oiartzabal psikologoak bederatzi urtetik gorako haur eta helduentzat.
