Marea gorritxoa Herriko Plazan
Denboraldi berriko jokalari eta taldeen aurkezpena egin du gaur Touringek; 500 lagunetik gora arituko dira Fanderiako zelaian.
Touringeko jokalarien aurkezpena Touring Futbol taldeak denboraldi berriko jokalarien aurkezpena egin du gaur. Koldo Mitxelena ikastetxearen jolastokian egin du aurkezpena, talde guztiak pasa dira oholtzatik, banan bana, txikienetatik hasi eta handienetara. Ondoren, argazkia Herriko Plazan egin dute. Etengabe ari da handitzen Touringen jokalari kopurua, eta aurten, 500dik gora izango dira elastiko gorritxoa soinean Fanderiako futbol zelaian arituko direnak.
Urteroko usadioari jarraituta egin dute gaur aurkezpena, baina arrazoi bereiz bat ere bazuten aurtengo aurkezpen handirako, Touringen mendeurrena. Mikel Azkunek egin du aurkezpena euskaraz eta argi zehaztu ditu klubaren helburuak: “Ordezkatzen dugun kirol elkartea herrian txertatu eta gizarteratzeko helburua ardatz hartuta, herrian egiten dugun ekitaldi hau beste pausu bat gehiago da”.
500 jokalari, neska eta mutil eguneroko jardunean ariko direla Fanderian gogorarazi du Azkunek, “neska eta mutil gogor eta gogoz entrenatu, futbola gozatu eta bizitzen dutenak, baina beti, eta ahaztu gabe, giza baloreen transmisioa ardatz hartuta”.
Zuzendaritzaren izenean, eskerrak eman dizkie Azkunek azken urte hauetan, “pandemia luze bat tarteko”, proiektuarekin bat egin duten guztiei, eta batez ere sustengu ekonomikoa eman dieten babesleei, “mila esker berriro ere”.
