Delirium Tremensen atzeratutako kontzertuak data berria du
Azaroaren 4an jo behar zuten Landetxe auditorioan, Zurrounkekin batera, baina bertan behera geratu zen emanaldia. Otsailaren 17a da data berria.
Delirium Tremens taldeak iaz kaleratu zuen disko berria. Delirium Tremens eta Zurrounk taldeek kontzertua eman behar zuten pasa den larunbatean —hilak 4— Landetxe auditorioan.
Kontzertua atzeratu egin zuten, eta data berria ezarri dute: otsailaren 17an izango da. Jakinarazi dutenez, pasa den larunbateko sarrerek egun horretarako balio izango dute. Kontzertu hori 22:30ean hasiko da.
Hala ere, azarorako erosi zuen norbaitek otsaileko kontzertua joateko aukerarik ez badu dirua itzultzeko eskatu dezake. Bi modutara egin daitekeela jakinarazi dute: alde batetik, posta elektroniko bidez idatzita; bestetik, Landetxeko leihatilan bertan, astelehenetan 17:30etik 19:00etara.
Sarrerak erosi nahi dutenek, eskuragarri dituzte udalaren sarreren webgunean. Aldez aurretik erosita 12 euroko prezioa izango dute, eta egunean bertan 15 eurora igoko da salneurria.
Disko berria aurkezten
Euskal rockaren bigarren kolpearekin batera sorturiko taldea da Delirium Tremens. 1991. urtean desegin zen arren, 2022an agertokietara itzuli ziren Hordago izeneko disko berriarekin.
Azken hilabeteetan kontzertuak eskaintzen ibili dira Euskal Herrian zein Espainiako Estatuan. Otsailaren 17an herrian egingo dute emanaldia, Zurrounk talde oiartzuarrarekin batera.
